Qazaqstandyq qajylar Saýd Arabııasyna keldi
«30 shildede Qazaqstan Respýblıkasynyń Jıdda qalasyndaǵy (Saýd Arabııasy Koroldigi) Konsýldyǵynyń qyzmetkerleri Jıdda halyqaralyq áýejaıynda «Shymkent-Jıdda» jáne «Aqtaý-Jıdda» baǵyttarymen ushyp kelgen 198 adamnan turatyn qazaqstandyq qajylardyń alǵashqy eki tobyn kútip aldy. Jalpy alǵanda, SAK Úkimeti bólgen kvota boıynsha bıylǵy jyly 3,2 myń otandasymyz Koroldik terrıtorııasyndaǵy qasıetti jerlerge zııarat jasaý múmkindigine ıe. Úlken qajylyq merzimi 9-13 tamyz aralyǵyna sáıkes keledi», delingen habarlamada.
Bıylǵy jyly, ádettegideı, qazaqstandyq qajylardy Koroldiktegi Jıdda men Medına qalalaryna Nur-Sultannan, Almatydan, Shymkentten jáne Aqtaýdan otandyq jáne saýdtyq «SCAT» jáne «FlyNas» áýekompanııalary, sáıkesinshe, birlesip tasymaldaıdy.
Atap aıtqanda, SAK avıatsııalyq bılik oryndarymen aldyn ala kelisilgen kestege sáıkes, azamattarymyzdyń Saýd Arabııasyna kelý merzimi 30 shildege, qaıtý merzimi - 17 tamyzǵa belgilengen. Qazirgi ýaqytta qajylyq maýsymy kezinde arnaıy rejimde jumys isteıtin konsýldyq elimizdiń Er-Rııad qalasyndaǵy elshiliginiń jalpy úılestirýimen qazaqstandyq qajylardy qabyldaý, olarǵa qajylyq rásimderin ótý kezderinde qolaıly jaǵdaı jasaý, Koroldikte bolý kezeńderinde qaýipsizdikterin qamtamasyz etý, sondaı-aq olardy elge ýaqtyly jetkizý máselelerimen tikeleı aınalysýda. Osy maqsatta Saýd Arabııasynyń «Qajylyq-2019» maýsymyna jaýapty úkimettik jáne avıatsııalyq bılik oryndarymen tikeleı baılanys ornatqan.
Jalpy, Jıdda men Medına qalalarynda qajylardy kútip alý men shyǵaryp salý konsýldyq tarapynan dıplomattardyń kezekshilik kestesi negizinde qatań túrde júzege asyrylady. Koroldiktiń joǵarǵy oqý oryndarynda bilim alýdaǵy qazaqstandyq stýdentter de bul jumysqa jıi jumyldyrylyp otyrady. Konsýldyq tarapynan qajylar arasynda turǵylyqty eldiń zańdylyqtaryn saqtaý, túrli juqpaly aýrýlardyń (tumaý, menıngıt) aldyn alý úshin sanıtarlyq-gıgıenalyq erejelerdiń saqtalýyna mán berý, jergilikti salt-dástúrlerge qurmetpen qaraý jáne t.b. máseleler boıynsha tıisti túsindirme jumystary júrgiziledi.
Mekke men Medına qalalarynyń ortalyq shtabtarynda qazaqstandyq «Qajylyq-mıssııasy» uıymdastyrǵan statsıonarlyq bólimsheler táýlik boıy jumys isteıtin bolady. Olarda qazaqstandyq dárigerler tarapynan qajylarǵa alǵashqy medıtsınalyq kómek beriledi.
Eske sala ketsek, bıyl Saýd Arabııa bıligi bıylǵy qajylyqqa vıza alý jolyn ońtaılandyrdy. Álemniń ár túkpirinen baratyn azamattar endi qajylyq vızasyn elektrondy júıe arqyly alady.
Aıta keterligi, Saýd Arabııasy Koroldiginiń qajylyq isteri boıynsha mınıstrligi 2018 jyly Qazaqstanǵa qajylyq sapar úshin 3 myń kvota bólgen bolatyn.
