Qazaqstandyq kaskaderler «Ertuǵyryldyń» jańa maýsymyndaǵy trıýkterin kórsetti
ASTANA. QazAqparat - Qazaqstandyq kaskaderler «Ertuǵyryl» atty túrik serıalynyń jańa maýsymynda da jemisti jumys istep jatyr. «NOMAD» kaskaderler tobynyń jetekshisi Jaıdarbek Kúngújınov áleýmettik jelide jarııalaǵan vıdeorolıkte mamandardyń jańa qoıylymdary kórsetilgen.
«Biz Almatyda «Tomırıs» fılminiń túsirilimine daıyndalyp jatyrmyz. Al osy ýaqytta Túrkııada Nomad Stunts tobynyń trıýk qoıýshylary Raıym Muratov pen Manas Janyshev «Ertuǵyryl» serıalynyń jańa maýsymynyń jumystaryn jalǵastyryp jatyr. Aıtpaqshy, bul serıaldyń jańa bólimi qazirgi tańda efırge shyǵyp ta qoıdy. Jańa trıýkterdi tamashalap, baǵa berińizder!» - dep jazdy Jaıdarbek Kúngújınov Feısbýktegi paraqshasynda.
Aıta keteıik, «NOMAD» kaskaderler toby 2001 jyly Qazaq memlekettik tsırkiniń atty akrobatıkalyq nomeriniń negizinde qurylǵan.
