Qazaqstandyq kásiporyndar memtapsyryspen jasandy tynys alý apparattaryn shyǵarýdy aıaqtady
QR Indýstrııa jáne ınfraqurylymdyq damý mınıstrliginen málim etkendeı, QR Densaýlyq saqtaý mınıstrligi barlyǵy 1500 apparatqa tapsyrys bergen. Sonyń eń sońǵy partııasy – 102 apparat Qostanaı jáne Aqmola oblysynyń aýrýhanalaryna jetkizildi.
«Ózge óńirlerdiń ótinimderi tolyqtaı oryndaldy. ÓJJ apparattary qoıylyp, mamandar oqytylyp, qondyrǵylar servıstik qyzmet kórsetýge berildi.
Ókpeni jasandy jeldetetin «BIYOVENT» statsıonarlyq apparattary otandyq «Qazaqstan ASELSAN ınjınırıng» JShS qorǵanys-ónerkásiptik kesheninde jasaldy.
Budan bólek, bıylǵy tamyz aıynda QR IIDM QR Densaýlyq saqtaý mınıstrligimen birlesip, «Tynys» AQ-da shyǵarylǵan shaǵyn ÓJJ apparattarymen jedel járdem stansalaryn qamtamasyz etý boıynsha memlekettik tapsyrysty aıaqtady», - dedi QR IIDM-nen.
Málim etilgendeı, osylaısha, ÓJJ apparatynyń otandyq óndirisin jolǵa qoıý jónindegi Memleket basshysy men QR Úkimetiniń tapsyrmasy oryndalyp, pandemııanyń yqtımal ekinshi tolqynyna daıyndyq aıasynda medıtsınalyq mekemeleri ÓJJ apparattarymen jetkilikti mólsherde qamtamasyz etildi.
«Óz kúshimizben ÓJJ apparatyn óndirý máselesi kóktemde, COVID-19 aýrýynyń alǵashqy tolqyny kezinde týyndady. Ol kezde ÓJJ apparattaryn jetkilikti kólemde aqshaǵa satyp alý múmkin bolmaı qaldy. Ár el ózderiniń qajettilikterin ótep, baǵa aspandap ketti. Bir apparat úshin 20 mln teńgege deıin surady», - deıdi QR IIDM Qorǵanys ónerkásibin damytý jónindegi departament dırektory Sergeı Chernenok.
