Qazaqstandyq kásipqoı boksshynyń jańa qarsylasy belgili boldy
ASTANA. QazAqparat - Orta salmaqtaǵy qazaqstandyq kásipqoı boksshy Aıdos Erbosynulynyń qarsylasy aýysty, dep habarlaıdy QazAqparat tilshisi.
Osyǵan deıin tórt kezdesý ótkizip, barlyǵyn da merziminen buryn aıaqtaǵan Aıdos Erbosynuly besinshi aıqasynda 23 naýryz kúni Nıý-Iorkta jergilikti boksshy Maıkl Mıtchellmen (4-7-2) judyryqtaspaq bolǵan edi.
Alaıda, jekpe-jek jaqyndaǵan ýaqytta qarsylasy belgisiz sebepterge baılanysty kezdesýden bas tartty.
Endi ol taǵy bir amerıkalyq boksshy Rıarýsa Dadlımen (5-1-1, 2 KO) aıqaspaq.
Bizdiń otandasymyz Aıdos Erbosynuly tórt kezdesýdiń ekeýin Ýkraınada, qalǵan eki jekpe-jekti óz elimizde ótkizgen bolatyn. Al 23 naýryzdaǵy aıqasy AQSh aýmaǵyndaǵy alǵashqy jekpe-jegi bolmaq.
