Qazaqstandyq kásipqoı boksshynyń qarsylasy belgili boldy
ASTANA. QazAqparat - Qazaqstandyq kásipqoı boksshy Bahtııar Eıýbov sporttyq mansabyndaǵy on birinshi jekpe-jegin Nıý-Iorkte (AQSh) ótkizedi. 2016 jyldyń 15 sáýirine josparlanǵan jekpe-jekte otandasymyz jergilikti boksshy Samýel Tıhpen judyryq túıistiredi, dep jazady massaget.kz.
29 jastaǵy qazaqstandyq boksshy sońǵy jekpe-jegin 22 qańtar kúni ótkizip, amerıkalyq Djared Robınsondy úshinshi raýndta-aq nokaýtpen jeńgen bolatyn. Osyǵan deıin ótkizgen on jekpe-jeginde de Bahtııar Eıýbov mezgilinen buryn jeńiske jetken.
Bahtııar Eıýbov pen Samýel Tıh arasyndaǵy jekpe-jek 8 raýndqa josparlanǵan. Birinshi jartylaı orta salmaq (63,5 kg deıin) dárejesinde ótedi. Amerıkalyq boksshy osyǵan deıin 9 kezdesý ótkizip, 7-de jeńiske jetken. 1 ret jeńilis tapsa, 1 jekpe-jeginde qarsylasymen teń túsken.
Bahtııar Eıýbov pen Samýel Tıh arasyndaǵy jekpe-jekti amerıkalyq bedeldi telearna «Show Time» tikeleı efırde kórsetedi.
Aıta keteıik, Bahtııar Eıýbovtyń judyryqtasý máneri ózgeshe. Ol qarsylasyn birinshi raýndta-aq uryp qulatýdyń jolyn izdeıdi. Osyǵan deıin otandasymyz sporttyq mansabynda bir qarsylasyn (Joze Brıýıer, 2012 jyl) 9 sekýndta jeńgen. Onyń judyryqtasý mánerin 1990 jyldary kásipqoı boks sharshy alańynda jasyndaı jarqyldaǵan amerıkalyq boksshy Djerald Makklellanǵa da uqsatýǵa bolady. Ol da qarsylasyn birinshi raýndta-aq jeńip shyǵýdy basty maqsat tutatyn boksshylardyń biri bolatyn.
