Qazaqstandyq kásipqoı boksshylardyń WBA reıtıngi jarııalandy
NUR-SULTAN. QazAqparat – Dúnıejúzilik boks qaýymdastyǵy (WBA) barlyq salmaq sanatyndaǵy boksshylardyń jańa reıtıngin jarııalady, dep habarlaıdy QazAqparat áleýmettik jelidegi «Qazaqstannyń kásipqoı boksy» paraqshasyna silteme jasap.
Jańa tizim boıynsha, sýperaýyr salmaqta óner kórsetetin qazaqstandyq Ivan Dychko bir saty tómen syrǵyp, 14-orynǵa ornalasqan. TOP-3 Trevor Braıan (AQSh), Aleksandr Ýsık (Ýkraına) jáne Entonı Djoshýalardan (Ulybrıtanııa) quralǵan.
Ekinshi orta salmaq sanatyndaǵy WBA International, WBO Global jáne WBC Asia Continental beldikteriniń ıesi Aıdos Erbosynuly tórtinshiden úshinshi orynǵa kóterildi. Birinshi orynda — brıtanııalyq Djon Raıder, ekinshi — reseılik boksshy Fedor Chýdınov.
Jartylaı orta salmaqtaǵy WBA Inter-Continental beldiginiń ıegeri Nursultan Jańabaev burynǵysha jetinshi satyda ornalasqan. Osy sanattyń basynda reseılik Aleksandr Bespýtın tur, ekinshi oryn onyń jerlesi Radjab Býtaevqa buıyrǵan. Al kýbalyq Iordenıs Ýgas úzdik úshtikti túgendegen.
