Qazaqstandyq kásipqoı boksshylar Almatyda ótken halyqaralyq týrnırde el mereıin ústem etti
ALMATY. Qazannyń 26-sy. QazAqparat /Erlik Erjanuly/ - Almatyda Respýblıka kúnine oraı "Abylaı han" kásipqoı sport klýby men Almaty qalasy ákimdigi birigip uıymdastyrǵan kásipqoı boks pen aralas jekpe-jekten halyqaralyq týrnır ótti,
dep habarlaıdy QazAqparat.
Onda kásipqoı bokstaǵy tuńǵysh jekpe-jegin qyrǵyz boksshylarymen ótkizgen Ánýar Musaǵulov pen Marat Súleımenov 4 raýndyq saıysta upaı sanymen alǵashqy jeńisterine qol jetkizdi. Ánýardyń qarsylasy buǵan deıin 4 kezdesý ótkizgen (3 jeńis, 1 jeńilis) Erlan Ismaılov. Al Marattyń qarsylasy osy ýaqytqa deıin 8 kezdesý jasaǵan (2 jeńis, 6 utylys) Azızbek Qalmamatov boldy. Al qalǵan Qazaqstan men Ózbekstan bylǵary qolǵap sheberleriniń 6 raýndyq 5 kezdesýi de nokaýtpen aıaqtaldy. Onda Mırjan Jaqsylyqov Zıovıdın Mamarızaevty 1-shi raýndta, Qanat Qartenbaev Hýrshıdbek Maddamınovty, Mırat Sársembaev Asror Sotvoldıevti 4-shi raýndta tehnıkalyq nokaýtpen jeńdi. Sondaı-aq Aleksandr Jýravskıı 2-shi raýnda Bekzod Shokırovty jáne Berik Qalıev 3-shi raýndta Gıezıdın Mamjanovty esten tandyryp, nokaýtpen utty. Mırjan Jaqsylyqov pen Berik Qalıev "Snaıper" klýbynda, al qazaqstandyq ózge bylǵary qolǵap sheberleri "Abylaıhan" klýbynda jattyqqan bolatyn.
"Men bul týrnırde grýzııalyq Hvıcha Papıashvılımen judyryqtasýǵa daıyndalǵan edim. Qarsylasymnyń ózgerip ketkenin jarysqa 1 kún qalǵanda ǵana bildim. Ózbekstandyq Asror Sotvoldıevti buryn kórmek turmaq, atyn da estimegen edim. Sondyqtan alǵashqy raýndtarda ony erkin jiberip kóreıin dep sheshtim. Fızıkalyq jaǵynan myqty solaqaı boksshy eken. Meni jeńem dep kelgeni kórinip-aq turdy. Bul joly bokstasý mánerimdi de ózgerttim. Búgin inim Marat ta alǵashqy kezdesýin ótkizip, tuńǵysh jeńisine qol jetkizdi", deıdi Mırat Sársenbaev.
