Qazaqstandyq kásipqoı boksshy qarsylasyn nokaýtqa jiberdi
QOSTANAI. QazAqparat - 28 jastaǵy qostanaılyq boksshy Jan Kosobýtskıı kásipqoı bokstaǵy alǵashqy kezdesýinde qarsylasyn nokaýtqa jiberdi, dep habarlaıdy QazAqparat tilshisi.
Boks keshi Belarýstiń Borısov qalasynda ótti. Jan Kosobýtskıı latvııalyq Edgars Kalnarspen qolǵap túıistirdi. Tórt raýndqa josparlanǵan kezdesý bastalmaı jatyp aıaqtaldy. Kosobýtskıı qarsylasyn birinshi raýndtyń basynda-aq sulatyp túsirdi.
«Men birneshe jyl boıy rıngke shyqpadym. Birinshi kezdesý byltyr josparlandy. Ras, qarsylasym meni tańǵaldyra almady. Barlyǵy men oılaǵandaı boldy. Aldaǵy ýaqytta dárejesi joǵary sportshylarmen shyǵamyn», - dedi ol tilshilerge bergen suhbatynda.
Qazaqstan birinshiliginiń úsh dúrkin jeńimpazy, jazǵy Ýnıversıada oıyndarynyń kúmis júldegeri Jan Kosobýtskıı kásipqoı bokstaǵy ekinshi kezdesýin qazan aıynda ótkizýi múmkin. Onyń qarsylasy áli belgisiz.
