Qazaqstandyq kásipqoı boksshy Qanat Islam Almatyǵa oraldy
Ońtústik astananyń Halyqaralyq áýejaıynda Qanatty qarsy alý úshin 200-ge jýyq adam jınaldy. Olardyń arasynda Respýblıkalyq sport kolledjiniń dırektory Amalbek Tshanov, Qazaqstannyń boks federatsııasynyń vıtse-prezıdenti, belgili metsenat Baýyrjan Ospanov, bokstan Olımpıada chempıony Ermahan Ybyraıymov jáne basqa da belgili tulǵalar boldy.
Qanat Islam vip zaldan kórinisimen taǵatsyzdana kútip turǵan dúıim jurt ony: «Qanat, Qanat!», «Qanat jasasyn!», «Qanat - qazaqtyń batyry!» degen sekildi urandar aıtyp qarsy aldy. Kók baıraqty kótergen respýblıkalyq sport kolledjiniń bir top stýdentteri de «Qanat, Qanat!» dep urandaýmen boldy. Eń aldymen ózine qashanda qoldaý kórsetip júrgen aǵalarymen qushaqtasyp kórisken Qanat, ulttyq kıim kıgen qazaq arýlarynyń qoshemetimen syrtqa bettedi.
Kópshilik aldynda Amalbek Tshanov barsha qazaqstandyq jankúıerlerdiń atynan Qanattyń ıyǵyna shapan japty.
«Qazaq halqynyń ár kezde de ózderiniń batyrlary bolǵan. Qanat - búgingi qazaq batyry. Óıtkeni, ol qazaqtyń kók baıraǵyn jelbiretip, qazaq halqyn búkil álemge tanytyp júrgen ardaqty ulymyz», - dedi A. Tshanov.
Óz kezeginde Qanattyń qamqorshy aǵalarynyń biri Baýyrjan Ospanov ta Qanatty kezekti jeńisimen quttyqtap, aldaǵy ýaqytta da jankúıerlerin qýanta berýine tilektestik bildirdi.
Al Olımpıada chempıony Ermahan Ybyraıymov: «Týǵan elge qosh keldiń Qanat», "Jasasyn Qanat", «Qazaqstan alǵa!» - dep taǵy da uran tastady.
Osydan keıin, «ulymnyń tusaýy kesilse eken» dep úmittenip kelgen Qanattyń tilegi oryndaldy. Kópshilik aldyna onyń kishkentaı uly Abylaıhan shyǵarylyp, aıaǵyna ala jip baılandy. Sóıtip, qaýmalaǵan jurttyń súıemeldeýimen táı-táı basqan Abylaı baspaldaqpen joǵary qaraı júrip ákesine jetti. Qanat ulynyń tusaýyn kesip, ony meıirlene qushaǵyna basty.
Óz sózinde Qanat qatty tolqyp, bul tosyn syıǵa qatty rıza bolǵandyǵyn jetkizdi.
«Assalaýmaǵaleıkúm halqym! Mundaı tosyn syı bolady dep oılamaǵan edim. Kóp rahmet sizderge! Munyń barlyǵy, eldigimizdiń, egemendigimizdiń arqasy dep bilemin. Tynyshtyq bolmasa bizdiń boks, bizdiń óleń kimge kerek. Sondyqtan men óte qýanyshtymyn. Rahmet sizderge!" - dedi Q. Islam.
Ol sonymen qatar, ózine qamqorshy bolyp júrgen aǵalaryna zor rızashylyǵyn bildirip, aldaǵy ýaqytta da jankúıerlerin jańa jeńisterimen qýantýǵa kúsh salatyndyǵyn jetkizdi.
«Qazaqtyń kók Týyn kókke jelbiretý, qazaqty búkil álemge tanytý meniń bala kúngi armanym. Meniń tilerim, qazaq elinde tek tynyshtyq bolsa eken. Jetistikterge jetip jatqanymyzdyń barlyǵy osy tynyshtyqtyń arqasy. Men aldaǵy ýaqytta da sizderdi jańa jeńisterimmen qýantamyn dep oılaımyn», - dedi Qanat Islam.
Vıdeo Qamshy.kz saıtynan alyndy