Qazaqstandyq kásipkerlerdiń jobalary Tatarstanda qoldaý tapty
ORAL. QazAqparat - Batys Qazaqstan oblysynyń delegatsııasy Tatarstan Respýblıkasynyń astanasy Qazan qalasynda boldy, dep habarlaıdy QazAqparat tilshisi.
Sapardyń maqsaty - saýda-ekonomıkalyq jáne ınvestıtsııalyq yntymaqtastyqty odan ári nyǵaıtý.
Jumys sapary aıasynda óńir basshysy Altaı Kólginov bastaǵan oblys delegatsııasy Tatarstan Prezıdenti Rýstam Mınnıhanovpen kezdesti.
«Qazaqstan-Reseı qatynastary dástúrli túrde strategııalyq áriptestiktiń joǵary deńgeıimen erekshelenedi. Reseı Qazaqstannyń eń iri saýda áriptesi bolyp tabylady. Osyndaı qarym-qatynastardy damytýda Tatarstan Respýblıkasynyń qosqan úlesi zor. Kúni keshe Elbasymyz Nursultan Ábishuly Nazarbaev Sizderde boldy. Bul sapar bizdiń áriptestigimizdiń barlyq salalaryna jańa serpin berdi», - dedi oblys ákimi Altaı Kólginov.
Óńir basshysynyń aıtýynsha, 2017 jyly Qazaqstan men Tatarstan arasyndaǵy taýar aınalymy 700 mln AQSh dollardy qurady. Onyń ishinde 100 mln AQSh dollardan astamy Batys Qazaqstan oblysynyń úlesinde.
Sonymen qatar Batys Qazaqstan oblysynyń ekonomıkalyq áleýeti jáne onyń ınvestıtsııalyq múmkindikteri týraly sóz qozǵaldy.
«Búginde Eýrazııa odaǵynyń elderimen tyǵyz yntymaqtastyqtyń tabysty mysaldary bar. Olardyń negizgi úlesi Reseı Federatsııasynda. «Jelaev nan ónimderi» kombınaty «Tat-spaıs» kompanııasyna un jáne makaron ónimderin berýde. «Nurjanar» kompanııasy «TAT Krahmal patoka» kompanııasynan kvasty óndirýge qajetti ónimin alýda. «Oral transformator zaýyty» Tatarstan elinen plastıkalyq qubyr, polımerlik tabandyq, kran-balkalar alyp turady. «Gıdromash Orıon-MJBK» kompanııasy beton aralastyrǵysh toraby úshin qajetti dozatorlarmen qamtamasyz etilýde. Sondaı-aq «Kama Qazaqstan» kompanııasy avtokólikter shınalaryn satyp alýda», - dep atap ótti oblys ákimi.
Kezdesýde BQO kásipkerleri birneshe bıznes-jobalardy tanystyryp, Tatarstan tarapynan tolyq qoldaýǵa ıe boldy.
BQO ákimi Tatarstan Respýblıkasynyń Prezıdenti Rýstam Mınnıhanovty qyrkúıek aıynda Oral qalasynda ótetin Sabantoıǵa shaqyrdy.
Sondaı-aq sapar aıasynda iskerlik kezdesý ótti. Onda qos tarap ekonomıkanyń barlyq salalaryndaǵy ózara áriptestikti odan ári keńeıtý máselelerdi talqylady.
