Qazaqstandyq kásipkerler syranyń bir markasy úshin taýar belgisiniń ıesine jylyna 6 mln. eýro tólep otyr - B.Imashev

ASTANA. QazAqparat - Qazaqstandyq kásipkerler syranyń bir markasy úshin taýar belgisiniń quqyǵyn ıelenýshige jylyna 6 mln. eýro tólep otyr. Búgin Májilistegi Úkimet saǵatynda QR Ádilet mınıstri Berik Imashev osylaı málim etti.

«Zııatkerlik menshik salasynda biz negizinen ózimizdiń kez-kelgen alańdarymyzda, sonyń ishinde quqyqty túsindirý jumystary boıynsha bızneske kóp basymdyq beremiz. Ekinshi jaǵynan «satyp al da sat» - bul asa kúrdeli ári aýqymdy jumys. Árıne, zııatkerlik menshikke qatysty bolǵandyqtan, bul baǵytta saýdanyń nysany boıynsha da jaqsy júzege asatyn mysaldar barshylyq. Máselen, bizdiń Qazaqstanda álemge áıgili syranyń bir markasy tirkelgen, men onyń atyn atamaımyn, degenmen osy markany paıdalanatyn bizdiń kásipkerler osy markany qoldanǵany úshin jylyna 6 mln. eýrony dál osy taýar belgisiniń quqyqtyq ıegerine tólep otyr», - deıdi mınıstr B.Imashev.

Bul rette vedomstvo basshysy zııatkerlik menshik quqyǵyn qorǵaý týraly máseleniń kommertsııalyq quramyna nazar aýdartyp otyr.

Toqtala ketetin jaıt, Qazaqstan 1993 jyldan bastap Dúnıejúzilik zııatkerlik menshik uıymynyń qatysýshysy bolyp tabylady. Osy uıymǵa múshe bolý jáne Dúnıejúzilik zııatkerlik menshik uıymynyń 19 bazalyq halyqaralyq shartyn ratıfıkatsııalaý ulttyq zańnamany qabyldanǵan mindettemelerge, onyń ishinde qazaqstandyq avtorlardyń jáne shetelderdegi quqyq ıelenýshilerdiń quqyqtaryn qorǵaý bóligindegi mindettemelerge sáıkes úılestirýge múmkindik berdi.