Qazaqstandyq kásipkerler oqýshylarmen tájirıbe bólisýde
QARAǴANDY. QazAqparat - Qaraǵandy oblysynyń mektepteri men kolledjderinde «Qarjylyq saýattylyq kúni» ótti. Bul týraly oblys ákimdiginiń baspasóz qyzmetinen málim etti, dep habarlaıdy QazAqparat.
Sharanyń negizgi maqsaty - qatysýshylardy qarjylyq mádenıetke baýlý.
«Qarjylyq saýattylyq kúnin» Qaraǵandy oblysynyń Bilim basqarmasy jáne Qaraǵandy oblysynyń Bilimdi damytý oqý-ádistemelik ortalyǵy uıymdastyrdy.
Synyp saǵattarynda oqýshylar men stýdentterge bıýdjetti qalaı durys josparlaý kerektigi, óz isin ashý, banktik operatsııalardy ótkizý jáne kiristerdi basqarý týraly aıtyldy.
Sabaqtan tys dáristerde taqyryptyq oıyndar uıymdastyryldy jáne aqparattyq stendter daıyndaldy.
Oqý oryndary bıznesmender men bank qyzmetkerlerin shyqyryp, olar óz tájirıbelerimen bólisti jáne balalardyń suraqtaryna jaýap berdi.
Mysaly, Ahmet Baıtursynov atyndaǵy № 41 mektep-gımnazııada «Nátıje» kompanııasynyń prezıdenti Erlan Áshimov boldy. Al «Daryn» mamandandyrylǵan mektep-ınternatyna «Halyq banktiń» mamany Danıra Abdrahmanova qonaqqa bardy. «Bilim ınnovatsııa» lıtseı-ınternatyna «BTS digital» kompanııasynyń prezıdenti Saıasat Nurbek shaqyrylǵan.
«Qarjylyq saýattylyq - eń negizgi ıkemderdiń biri. Bizge bul mashyqtardy túrli oıyndar jáne dárister arqyly úıretedi. Buǵan qosa, kóptegen kórnekti adamdarmen kezdesý sáti tústi. Olar bizge aqshany qalaı jumsap, onyń qalaı kóbeıtýge bolatyny týraly aıtyp berdi», - deıdi №41 mektep-gımnazııasynyń 9-synyp oqýshysy Naryqbaı Núrken.
«Qarjylyq saýattylyq kúni» aktsııasy Qaraǵandy oblysynda jyl saıyn ótkiziledi. Bıylǵy jyly ol tórtinshi ret uıymdastyryldy.
