Qazaqstandyq kartına Máskeý kınofestıvaliniń negizgi baǵdarlamasyna kirdi
ASTANA. QazAqparat - «Qazaqfılm» kınostýdııasy túsirgen, rejısser Ádilhan Erjanovtyń «Tańsári» tolyqmetrajdy kórkem fılmi Máskeý halyqaralyq kınofestıvaliniń negizgi baıqaýyna iriktelip alyndy, dep habarlaıdy «QazAqparat» HAA tilshisi kınostýdııanyń baspasóz qyzmetine silteme jasap.
Kınotýyndy QR Mádenıet jáne sport mınıstrliginiń tapsyrysy boıynsha túsirilgen. Fılm 19-26 sáýir aralyǵynda Reseı astanasy Máskeýde ótetin 40-shy Máskeý halyqaralyq kınofestıvaliniń negizgi baıqaýyna iriktelgen.
"Menińshe, búgingi álemde bolyp jatqan dúnıelerdi mıfologııalyq oılaý arqyly ǵana naqty túsindirýge bolady. Ratsıonalızmniń endigi qajeti shamaly. Jańa kınematograftyń arhetıptik kúshi - folklor negizinde jatyr. Bizdiń mádenıet mınıstrligi avtorlyq kınoǵa qoldaý kórsetip otyrǵanyna qýanamyn. Meniń shyǵarmashylyǵyma túsinistikpen qaraǵan mınıstrlikpen yntymaqtastyqty jalǵastyra beremin, óıtkeni meniń fılmime tsenzýralyq shekteý qoıylǵan joq", - dedi fılmniń rejısseri Ádilhan Erjanov.
Halyqaralyq Máskeý kınofestıvaliniń negizgi baıqaýyna qazaqstandyq fılmnen basqa 14 týyndy iriktelgen. Olar: «12-shi adam» (rej. Harald Tsvart, Norvegııa), «Soldat esteligi» (rej. Kım Djehan, Koreıa), «Gaspar toıǵa barady» (rej. Antonı Korde, Frantsııa), «Ashý» (rej. Serhıo Trefo, Portýgalııa), «Leonnyń jyly» (rej. Mersedes Laborde, Argentına), «Adasqandar» (rej. Dastın Fınelı, Jańa Zelandııa), «Búrkeý astyndaǵy Neapol» (rej. Ferzan Otspetek, Italııa), «Ofelııa» (rej. Kler Makkartı, SShA), «Rıchard tozaqqa qaraı bet aldy» (rej. Roberta Torre, Italııa), «Aıtary bar adam» (rej. ıAnıs Nords, Latvııa, Polsha, Lıtva), «Tabandylyq» (rej. Rashıd Malıkov, Ózbekstan), «Halef» (rej. Murat Dıýzgıýnoglý, Túrkııa), «Patsha-qus» (rej. Edýard Novıkov, Reseı) jáne «Nıý» (rej. ıAn Ge, Reseı).
Halyqaralyq baıqaýdyń ádil qazylar quramyna rejısser Anna Melıkıan (Reseı), prodıýser Paolo Del Brokko (Italııa), akter Djon Sevıdj (AQSh) jáne qytaılyq rejısser Lıan Tsıao kirdi.
Sonymen qatar atalǵan festıvaldiń «Sheberler» baǵdarlamasynda «Qazaqfılm» kınostýdııasynyń qatysýymen, otandyq rejısser Serik Aprymov túsirgen «Ákege qońyraý shalý» atty fılm kórsetiletin bolady. Esterińizge sala ketsek, bul kartına Qazaqstan kınosynshylar qaýymdastyǵy uıymdastyrǵan «Synshylar tańdaýy» kınojúldesinde eki birdeı júldege - «Úzdik rejısser» jáne «Ekinshi plandaǵy úzdik er adam róli» (akter Erbolat Ospanqulovqa tabystaldy) qol jetkizgen bolatyn. Odan bólek, atalǵan týyndy Reseıdiń «Nıka» atty kınojúldesine úmitker bolǵan.
