Qazaqstandyq karateshiler Japonııa ashyq chempıonatynda 3 altyn medal jeńip aldy
ORAL. QazAqparat - Tokıo qalasynda kıokýshınkaı karateden ótken Japonııa ashyq chempıonatynda Qazaqstan quramasy tabysty óner kórsetti, dep habarlaıdy QazAqparat tilshisi.
Ulttyq respýblıkalyq kıokýshınkaı-kan karate federatsııasy BQO fılıalynyń dırektory Solongo Ishannyń málim etkenindeı, atalmysh dodaǵa álemniń 23 elinen 850 sportshy qatysyp, baq synady.
Qazaqstan quramasy sapynda 15 karateshi óner kórsetti. El quramasy qorjynyna 3 altyn, 3 kúmis jáne 1 qola medal tústi.
Atap aıtqanda, oraldyq Nurgúl Saparova 16-17 jastaǵylar arasynda 55 kg salmaqta top jardy. Taǵy bir batysqazaqstandyq Gúlzııa Ómirzaqova (14-15 jas, 55 kg) jeńis tuǵyryna kóterilse, Elnara Toǵyzbaeva (+18 jas, 55 kg) kúmis júldege ıe boldy. Ekinshi jekpe-jeginde japondyq sportshyǵa jol bergen Ádil Baıǵýatov «Jeńiske degen jigeri úshin» atalymymen marapattaldy.
Sonymen qatar Qazaqstan quramasynan Aıbek Shaýkılov (16-17 jas, 65 kg) altynnan alqa taqsa, Aldııar Dosymov (16-17 jas, +65 kg) pen Kámıla Kemelbekova (12-13 jas, 50 kg) kúmisti oljalady. Taǵy bir qazaqstandyq Nuresil Qalym (10-11 jas, +35 kg) qola júldeni enshiledi.
«Endi 4 mamyr kúni Nur-Sultan qalasynda kıokýshınkaı karateniń barlyq federatsııalary arasynda eresekterdiń QR birikken chempıonaty ótedi. Onda jeńimpaz atanǵandarǵa KWU (kyokushin world union) versııasy boıynsha ótetin álem chempıonatyna joldama beriledi. Bul birinshilikke Batys Qazaqstan oblysynan Shaınur Sadyqov pen Elnara Toǵyzbaeva qatysady», - dedi QazAqparat tilshisine S.Ishan.
