Qazaqstandyq qamtý týraly zań jobasy birinshi oqylymda maquldandy

ASTANA. Qarashanyń 11-i. QazAqparat /Qanat Mámetqazyuly/  - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine qazaqstandyq qamtý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady,

dep habarlaıdy QazAqparat. 

Zań jobasy QR Prezıdentiniń Jarlyǵyn, Shetel ınvestorlary keńesiniń otyrysy barysynda Elbasynyń júktegen mindetterin oryndaýǵa baǵyttalady. Qujattyń maqsaty biryńǵaı monıtorıng jumysyn atqarý arqyly otandyq taýar óndirýshilerdi qoldaý, olardyń qyzmetin yntalandyrý bolyp tabylady. Sonymen birge, qujatta memlekettik organdar men uıymdardyń taýarlardy, jumystar men kórsetiletin qyzmetterdi satyp alýy kezinde qazaqstandyq qamtý máseleleri boıynsha memlekettik organdardyń ókilettigin belgileý sharalary qamtylady.

Budan basqa, qujat boıynsha satyp alý rásimderiniń ashyqtyǵy, qoljetimdiligi men ádilettik júıesin engizý kózdeledi. Bul shara óz kezeginde qazaqstandyq óndirýshiler men jetkizýshilerge taýarlardy, jumystar men kórsetiletin qyzmetterdi jetkizýge arnalǵan konkýrstarǵa sheteldik kompanııalarmen teń dárejede qatysýǵa múmkindik beredi. Munyń ózi elimizdiń aýmaǵynda óndiriletin taýarlar óndirisin oqshaýlaýǵa jáne olardyń nomenklatýrasyn keńeıtýge jaǵdaı jasaıtyn bolady.

Zań jobasyn ázirleý barysynda depýtattar «taýarlardy qazaqstandyq óndirýshi», «jumystaǵy qazaqstandyq qamtý», «kadrlardaǵy qazaqstandyq qamtý» sekildi birqatar uǵymdardy jańa redaktsııada engizdi.

Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke tapsyrylady.