Qazaqstandyq qamtý baǵytynda 740 mlrd. teńgeni quraıtyn 11 myń 907 kelisimshart jasaldy - Á. Isekeshov
Bul týraly QR Parlamenti Senatynda «Taýarlardy, qyzmetterdi satyp alý barysynda qazaqstandyq qamtý úlesin arttyrýdyń memlekettik saıasaty» atty taqyrypta ótken dóńgelek ústel jıynynda Indýstrııa jáne saýda mınıstri Áset Isekeshov málim etti, dep habarlaıdy QazAqparat.
«Memleket basshysynyń tapsyrmasyna sáıkes, Úkimet ulttyq kompanııalarmen, ákimdiktermen, jerdi paıdalanýshylarmen birlese otyryp búgingideı qıyn kezeńde qazaqstandyq qamtýdy arttyrý máselesimen aınalysyp otyr. Sonyń nátıjesinde aǵymdaǵy jyly 740 mlrd. teńgeni quraıtyn 11 myń 907 kelisimshart jasaldy. Bunyń ózi otandyq óndirýshiler úshin úlken ról atqarady dep aıtýǵa bolady. Degenmen de, endigi maqsat bundaı sharalardy júıeli qamtamasyz etý bolyp tabylady», dedi Á. Isekeshov.
Onyń aıtýynsha, álemdegi jaǵdaıǵa baılanysty sońǵy ýaqyttarda otandyq mashına jasaý, metall óndirý salasyndaǵy qazaqstandyq qamtý úlesi ósken joq, kerisinshe tómendeı túsken. Osyǵan oraı, Indýstrııa jáne saýda mınıstrligi qazaqstandyq úlesti arttyrý máselesine qatysty arnaıy zertteýler júrgizip, qamtymdylyqty arttyrýǵa baılanysty birshama júıeli kemshilikterdi anyqtaǵan. «Bundaı olqylyqtardy joıý úshin arnaıy tujyrymdama qabyldandy. Bul tujyrymdamanyń jalpy maqsaty ishki naryqtyń áleýetin tolyq paıdalana otyryp básekege qabiletti óndiristi qalyptastyrý bolyp tabylady», dedi mınıstr.
