Qazaqstandyq kadetter dzıýdodan Azııa chempıonatyn 4 altyn medalmen qorytyndylady
NUR-SULTAN. QazAqparat – Taıbeıde dzıýdodan jasóspirimder arasynda Azııa chempıonaty márege jetti, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, qurlyq birinshiligine 17 elden 200-ge jýyq dzıýdoshy qatysyp, baq synady.
Qazaqstandyq kadetter 4 altyn, 1 kúmis jáne 10 qola medal jeńip alyp, jalpykomandalyq esepte birinshi orynǵa ıe boldy.
Atap aıtqanda, Álıma Jumaǵalıeva (40 kg), Nurqanat Serikbaev (50 kg), Tilegen Tynarbaı (66 kg) jáne Aıdar Arapov (81 kg) chempıon atandy.
Al sońǵy básekede ǵana qarsylasyna ese jibergen Serikbol Estaı (73 kg) kúmis júldege ıe boldy.
Aslan Les (55 kg), Márlen Ádil (60 kg), Dıana Býrkeeva (44 kg), Balnur Ábdeshova (48 kg), Arýjan Erejepova (48 kg), Mýhammedalı Mavlıdov (81 kg), Jurqamyrza Shúkirbekov (+90 kg), Shapaǵat Dáýlet (57 kg), Mádına Paragýlgova (+70 kg) jáne Karına Takıeva (+70 kg) úzdik úshtikke iligip, qola medalmen marapattaldy.
Eske sala keteıik, budan buryn Zagrebtegi Gran-prı týrnırinde Galbadrahtyń jeńimpaz atanǵanyn, qazaqstandyq kadetterdiń Azııa chempıonatynyń alǵashqy kúni 3 altyn, 5 qola medal jeńip alǵanyn jazǵan bolatynbyz.
