Qazaqstandyq-ızraıldik agrarlyq zertteýler qory qurylady -Aýyl sharýashylyǵy vıtse-mınıstri
ASTANA. Qańtardyń 21-i. QazAqparat /Qanat Mámetqazyuly/ - Qazaqstandyq-ızraıldik agrarlyq zertteýler qory qurylady.
Búgin QR Parlamenti Senaty Agrarlyq máseleler jáne qorshaǵan ortany qorǵaý komıtetiniń «QazAgroInnovatsııa» AQ-da ótken kóshpeli otyrysynda Aýyl sharýashylyǵy vıtse-mınıstri Marat Orazaev osylaı málim etti, dep habarlaıdy QazAqparat.
Vıtse-mınıstrdiń aıtýynsha, búgingi kúni aýyl sharýashylyǵy salasynda ǵylymı ádisterdi engizý júıesin damytý maqsatynda tehnologııalardy qoldanýǵa baǵyttalǵan arnaıy ınstıtýttar qalyptasyp jatyr. Máselen, ótken jyly tehnologııalardy transfertteý ortalyǵy qurylsa, sol nysanda eki ınnovatsııalyq joba iske asyryla bastaǵan. Bunyń biri veterınarııa salasyn qamtysa, ekinshisi sýarmaly eginshilikke qatysty bolyp otyr.
«Sonymen birge, agroónerkásip kesheninde tórt bilim jetildirý ortalyǵy quryldy. Bul ortalyqtarda sheteldegideı ǵalymdar men ónim óndirýshiler arasynda tikeleı pikirtalas alańyn qurýǵa múmkindik bar. Sondaı-aq, Elbasynyń júktegen otandyq ǵalymdardy dúnıejúzilik qoǵamdastyqpen yqpaldastyrý jáne ǵylymı-zertteý jobalaryn iske asyrý mindeti de durys jolǵa qoıylyp otyr. Máselen, osy baǵytta mınıstrlik tarapynan qazaqstandyq-ızraıldik agrarlyq zertteýler qoryn qurý jumystary atqarylýda. Qordy qalyptastyrý úshin 2010 jylǵy bıýdjette arnaıy qarjy da qarastyrylǵan. Qazirgi kúni eki memleket arasyndaǵy kelisimshart ta ázirlenip, qujat memlekettik organdardyń kelisimine berilgen», dedi M. Orazaev.
