Qazaqstandyq ІT-kompanııalar ózbek áriptesterine óz múmkindikterin tanystyrdy
TAShKENT. QazAqparat - Qazaqstandyq 23 ІT-kompanııa Ózbekstan Respýblıkasynyń memlekettik organdary men bıznes ókilderine elektrondy úkimet, densaýlyq saqtaý, bilim, kólik, qaýipsizdik jáne ózge de salalardaǵy alpysqa tarta ІT-sheshimin tanystyrdy, dep habarlaıdy QazAqparat tilshisi.
Atalmysh jobalardyń tanystyrylymy QR Premer-Mınıstriniń orynbasary Asqar Jumaǵalıev pen ÓR Premer-Mınıstriniń birinshi orynbasary Achılbaı Ramatovtyń kezdesýi aıasynda ótti. Eki eldiń laýazymdy ókilderi «Tsıfrly Qazaqstan» baǵdarlamasy men Ózbekstannyń tsıfrly transformatsııasynyń yntymaqtastyǵy máseleleri boıynsha kezdesken bolatyn.
Tanystyrylymnyń ashylýynda sóz sóılegen Asqar Jumaǵalıev birlesken seriktestikke óziniń alǵysyn bildire otyryp, Ózbekstan ókilderine Qazaqstandaǵy Aqparattyq-kommýnıkatsııalyq salada júrgizilip jatqan negizgi jumystar týraly aıtyp berdi.
«Qazaqstan Prezıdentiniń qoldaýymen jáne tapsyrmasymen «Tsıfrly Qazaqstan» baǵdarlamasy bekitilip, qazirgi tańda atalmysh baǵdarlama belsendi túrde júzege asyrylyp jatyr. Álbette, taý-ken metallýrgııa, munaı-gaz jáne kóliktik-logıstıkalyq salada, sonymen birge agroónerkásiptik keshende tsıfrlandyrý belsendi túrde engizilip jatqanyn aıta ketý kerek. Tsıfrlandyrýdyń arqasynda biz operatsııalyq shyǵyndardyń 10 paıyzǵa qysqarǵanyn baıqap otyrmyz. Al mundaı kásiporyndarǵa bul aıtarlyqtaı aýqym jáne tsıfrlandyrýdy júrgizýdiń qanshalyqty mańyzdy ekenin osydan bilýge bolady», - dedi Asqar Jumaǵalıev.
Kezdesý qorytyndysy boıynsha taraptar arasynda yntymaqtastyq týraly memorandýmǵa qol qoıyldy. Naqtyraq aıtqanda, qazaqstandyq «Qazteleport» AQ kompanııasy men ózbekstandyq «Universal Bank» yntymaqtastyq týraly memorandýmǵa qol qoıdy.
Yntymaqtastyq týraly kelisimge sonymen birge «Ulttyq aqparattyq ortalyǵy» AQ pen Ózbekstan Respýblıkasynyń «Elektrondy úkimet júıesin damytý ortalyǵy» keldi. Taraptar UZINFOCOM memlekettik aqparattyq júıeni qoldaý jáne qurýǵa kelisip otyr.
ІT-kompanııalardan bólek, qazaqstandyq taraptan kezdesýge Qazaqstan Respýblıkasynyń Aqparat jáne kommýnıkatsııalar mınıstrligi, «Ulttyq «Zerde» ınfokommýnıkatsııalyq holdıngi» men ózge de uıymdardyń ókilderi qatysty.
ІT-kompanııalardyń tanystyrylymy men kezdesý baǵdarlamasyn myna siltemeden kórýge bolady:
