Qazaqstandyq ıpotekalyq kompanııa «Nurly jer» baǵdarlamasyn aıaqtady

ALMATY. QazAqparat - «Qazaqstan ıpotekalyq kompanııasynyń» basshylyǵy 2018 jyly «Nurly jer» memlekettik baǵdarlamasy boıynsha «Satyp alý múmkindigimen jalǵa beriletin turǵyn úı» baǵytynyń aıaqtalǵandyǵyn málimdedi, dep habarlaıdy QazAqparat tilshisi.

«Qazaqstan ıpotekalyq kompanııasy» AQ basqarma tóraǵasynyń orynbasary Aısultan Aqchýrınniń aıtýynsha, baǵdarlama aıasynda 2018 jyldyń sońyna deıin 972 myń sharshy metrdi paıdalanýǵa berý kózdelgen. Alaıda eldiń 20 qalasynda keıin satyp alý múmkindigimen jalǵa beriletin 1 mıllıon sharshy metr turǵyn úı paıdalanýǵa berilip, kórsetkish josparlaǵannan da asyp túsken.

«Qurylystyń jalpy bıýdjeti 163,3 mıllıard teńgeni qurady. Qarjynyń basym kópshiligi QR Ulttyq qorynan qaıtarylmaly negizde alyndy. 19,1 mıllıard teńgeni respýblıkalyq bıýdjetten jáne 29,2 mıllıardty jarǵylyq kapıtaldy toltyrý túrinde aldyq. Atalmysh qarajattardyń barlyǵy Qazaqstan ekonomıkasyna jumsalady», - dedi QIK basqarma tóraǵasynyń orynbasary.

Baǵdarlama eldiń qurylys salasyn odan ári damytýǵa zor múmkindik týdyrdy. Ol máresine jetýge taıap qaldy, sondyqtan jyl sońyna deıin Qostanaı, Qaraǵandy, Óskemen jáne Oral qalalarynan 40 myń sharshy metr turǵyn úıdi jalǵa berý berý josparlanǵan. Qazirgi tańda «Qazaqstan ıpotekalyq kompanııasy» AQ «7-20-25» prezıdenttik turǵyn úı baǵdarlamasyn júzege asyrýmen aınalysýda.