Qazaqstandyq ınjenerlerdiń jas býyny qurylys sapasy men ekologııaǵa kóbirek nazar aýdarýda - professor Ikýo Tohata
ASTANA. QazAqparat - Qazaqstandyq ınjener-qurylysshylardyń jas býyny qurylys sapasy men ekologııaǵa kóbirek nazar aýdaryp otyr. Bundaı pikirdi búgin elordada ótip jatqan Injener-geotehnıterdiń Azııalyq jastar konferentsııasy aıasynda «QazAqparatqa» Tokıo ýnıversıtetiniń professory Ikýo Tohata aıtty.
«Shynyn aıtsam, elderińizde bul saladaǵy ózgeristerge tańdanyp otyrmyn. On jyl buryn osyndaǵa qurylysta úlken qulshynys bolǵan edi jáne qurylys jumystary qarqyndy júrdi. Al qazirgi kezde adamdar qurylys sapasy, qorshaǵan ortany qorǵaý jáne basqa da máselelerge kóbirek alańdap otyr. Búgingi konferentsııada osy taqyrypta mańyzdy tanystyrylymdar boldy. Atap aıtqanda, saladaǵy qulshynys tájirıbege aınalyp, ınjenerlerdiń jas urpaǵy qurylystaǵy máselelerge egjeı-tegjeıli mán berýde. Jobalaýdyń jáne qurylystyń barsha úderisi eleýli túrde jan-jaqty ólshengen ári oılastyrylǵan bolyp otyr»,-dedi ǵalym.
Sonymen qatar ol Astananyń búgingi sáýlettik kórinisi unaıtyndyǵyn aıta kele, jobalaý men ǵımarattardy salý sapasyn oń baǵalady.
Aıta keteıik, konferentsııa maqsaty - barsha Azııa óńiriniń jas ınjener-geotehnıkterine ınteraktıvti tuǵyrnamany usyný, saladaǵy ınnovatsııalar boıynsha tájirıbe almasý, sondaı-aq qurylys, bilim jáne ǵylymda yntymaqtastyqtyń perspektıvaly joldaryn aıqyndaý.
Konferentsııa jumysyna 18 elden 100-ge jýyq mamandar men ǵalymdar qatysyp jatyr.
