Qazaqstandyq ınjener elordada dombyra úlgisindegi alyp ǵımarat salýdy usynyp otyr - Prezıdentke joldanǵan hattardan
ANA. Qarashanyń 5-i. QazAqparat /Arman Asqarov/ - Elbasy Nursultan Nazarbaevtyń tikeleı efır arqyly halyqpen tildesýine oraı jumys istep jatqan Baılanys ortalyǵyna habarlasqan ınjener-qurylysshy Dúısenhan Mallaqojaev Astanada qazaqtyń kıeli aspaby - dombyra úlgisinde alyp ǵımarat salýdy usynyp otyr,
dep habarlaıdy QazAqparat.
Elbasyǵa óz ıdeıasyn usynys hat retinde joldaǵan D.Mallaqojaev atalǵan jobany júzege asyrý arqyly el ordasy - Astana qalasyn ulttyq naqyshqa keltirýge úles qosýdy kózdegen. «Dombyra ǵımaratynyń bıiktigi 209 metr. Birinshi qabatta 2000 oryndyq úlken zal ornalasady. Osynyń arqasynda daýystyń estilýin erekshe etip túrlendirýge múmkindik týmaq. Al joǵary qabattarda kishi kontsert zalyn, meıramhanalar men qonaqúıler ashýǵa bolady. Ǵımarattyń aldyńǵy qasbetinde dombyranyń eki ishegimen jyljıtyn lıft arqyly 202 metr bıiktikte ornalasqan dombyra qulaǵynyń astynda túgeldeı derlik shynydan jasalǵan sholý alańy ornalasady. Jobanyń jalpy kólemi 50 myń sharshy metrge eseptelgen. Dombyranyń ishinen syrtqa quıylyp turǵan sýǵa qarap tilek aıtý dástúrin qalyptastyrýǵa bolady. Jalpy, ǵımarattyń aınalasyn úlken bir demalys ornyna aınaldyrýǵa bolar edi.
Qurmetti Nursultan Ábishuly! Sizdiń eńbek jolyńyzda budan da úlken jobalardy qolǵa alyp, alǵa bastap kele jatqandyǵyńyzdy óte jaqsy bilemin. Qasıetti qara dombyra úlgisiniń Astana tórine ornalasýy - bizdiń, qazaq eliniń, jańa zamandaǵy ǵımaratymen búkil álem jurtshylyǵy aldyndaǵy bedelin taǵy bir bıikke kóteretini sózsiz. Ideıanyń elektrondyq eskızi de bar», dep jazady D.Mallaqojaev.
