Qazaqstandyq ınvestorlarǵa jańa múmkindik: Abý Dabı qor bırjasymen kelisim jasaldy

ASTANA. QazAqparat – Astana International Exchange (AIX) jáne Abý Dabı qor bırjasy (ADX) yntymaqtastyqty nyǵaıtý jáne ekijaqty qatynasty keńeıtý týraly kelisimge qol qoıdy. Taraptar Tabadul platformasy arqyly ınvestorlar úshin bırjanyń qoljetimdi bolatyndyǵyna ýaǵdalasty, dep habarlaıdy QazAqparat tilshisi.

«Strategııalyq maqsatymyzdyń biri – halyqaralyq ekspertıza men halyqarylyq qor naryǵynyń mádenıetin Qazaqstanǵa ákelý jáne sheteldik ınvestorlardy tartý. Búgingi jasalǵan kelisim otandyq ınvestorlarǵa jańa múmkindikter beredi. ıAǵnı naryqqa qatysýshylar úshin múmkindikter aıasy keńeıedi. Jeke ınvestorlar lıtsenzııasy bar brokerler arqyly eki bırjada da saýda jasaı alady. ADX-pen saýda qatynasy bizdiń maqsatymyzǵa saı keledi. Sonymen qatar atalǵan kelisim aıasynda Qazaqstan men Parsy elderi naryǵy arasyndaǵy baılanys nyǵaıa túspek», - dedi AIX basqarma tóraǵasynyń mindetin atqarýshy Ásel Muqajanova «Astana Finance Days» konferentsııasy barysynda.

Uıymdastyrýshylar usynǵan málimetke sáıkes, ADX ótken jyly shildede saýda-sattyqqa ózara qol jetkizý modeline negizdelgen tsıfrlyq bırjanyń alǵashqy óńirlik ortalyǵy – Tabadul Hub-ty iske qosty.

Tabadul – múshe bırjalar arasyndaǵy óńirlik jáne jahandyq deńgeıde saýda jasaýǵa arnalǵan tsıfrlyq bırja alańy. Jalpy, Tabadul – ózara saýda-sattyq múmkindigin qamtamasyz ete otyryp, qatysýshy bırja naryǵynda yntymaqtastyqty nyǵaıtyp, ótimdilikti arttyrýǵa baǵyttalǵan.

Eske salsaq, bıyl qańtarda Memleket basshysy Qasym-Jomart Toqaev resmı saparmen Birikken Arab Ámirlikterine barǵan edi.

Sapar aıasynda Qasym-Jomart Toqaev BAÁ Prezıdenti sheıh Muhammed ben Zaıd Ál Nahaıanmen kelissóz júrgizdi. Eki el basshylary Qazaqstan men Ámirlik arasyndaǵy strategııalyq seriktestikti damytý perspektıvalaryn, sondaı-aq mańyzdy salalardaǵy saýda-ekonomıkalyq jáne ınvestıtsııalyq yntymaqtastyqty nyǵaıtý máselelerin talqylady.

Aıta keteıik, elordada qarjy salasyndaǵy iri oqıǵalardyń biri – «Astana Finance Days 2023» konferentsııasy ótip jatyr.

Atalǵan shara 2018 jyldan beri uıymdastyrylyp keledi. Onda otandyq jáne álemdik qarjy salalarynyń ózekti máseleleri, úrdisteri men múmkindikteri talqylanýda.