Qazaqstandyq ınvestorlarǵa Gonkongte qandaı jeńildikter beriledi
ASTANA. QazAqparat - Gonkongtiń arnaıy ákimshilik aýdany janyndaǵy «InvestHK» agenttiginiń bas dırektory Stıven Fıllıp qazaqstandyq ınvestorlardyń Gonkongte qandaı jeńildikter alatynyn túsindirip berdi, dep habarlaıdy QazAqparat.
Stıven Fıllıps - Ulybrıtanııa azamaty jáne Gonkong úkimetiniń memlekettik qyzmetshisi. Muny spıker Gonkongtegi basqarý júıesiniń biregeıligi dep túsindirdi.
«Gonkong «bir memleket - qos júıe» ustanymyn júzege asyryp keledi. Munda basqarýldyń ózgeshe júıesi, ózge zańnamalyq, atqarý, salyq jáne qarjy júıeleri qoldanylady. Búginde Gonkong ekonomıkasy Qytaıǵa qaraǵanda, Ulybrıtanııa men Aýstralııa ekonomıkasyna kóbirek uqsaıdy. Gonkong brıtandyq pretsedentti quqyq ustanymdaryna negizdelgen. Osylaısha, Gonkong Ulybrıtanııa, Kanada, Aýstralııadaǵy kontragentterimen jumys istep, tájirıbe jınaqtaǵan qazaqstandyq kompanııalar úshin barynsha túsinikti jáne ashyq», - dedi Stıven Fıllıp.
Onyń aıtýynsha, Gonkongtiń arnaıy ákimshilik aýdany qazir álemdegi lıberaldy jáne erkin ekonomıkalardyń biri bolyp otyr.
«Eń aldymen, Gonkongte qarapaıym jáne tómen salyq salý tájirıbesi júzege asyrylyp keledi. Bizde salyqtyń eki túri bar: korporatıvtik kirister men jeke tabys salyǵy. Kompanııanyń 250 myń AQSh dollaryna deıingi alǵashqy tabysyna salynatyn salyq 8,25% bolsa, sodan keıin 16,5% stavkasy qoıylady. Jeke tabys salyǵy da tegis emes, údemeli, ora eseppen halyq 5,7% tóleıdi. Bizde aınalymdyq nemese janama salyqtar joq.
Bizde satylym salyǵy, QQS, kapıtalǵa salynatyn salyq, zertteýler men dıvıdendter joq», - dedi agenttiktiń bas dırektory.
Qazirgi ýaqytta Gonkongte ekonomıkanyń ınnovatsııalyq quraýshysy, qyzmet kórsetý sektory, qarjy qyzmetteri, korporatıvtik qyzmet kórsetý jáne halyq tutynatyn taýarlaryn taratý salalary jolǵa qoıylǵan.
«Búginde ınnovatsııalyq damý salasynda Gonkong úkimeti basym sektorlardy anyqtady. Eń aldymen, jasandy ıntellekt, bıotehnologııa, qarjy tehnologııalaryn damytý mindeti tur. Biz búkil álemnen osy salalarda jobalardy júzege asyra alatyn daryndylardy shaqyramyz. Gonkong úkimeti osy salalardy damytýǵa 10 mıllıardtan astam AQSh dollaryn bóldi», - dedi ol.
Aǵa keńesshi Leonıd Orlovtyń aıtýynsha, qazirgi ýaqytta Gonkong platformasyn «Qazaqmys» jáne «Qazaqstan temir joly» ulttyq kompanııalary enshiles kompanııalarymen birge paıdalanyp otyr.
Ol búgin «Astana» halyqaralyq qarjy ortalyǵynyń basshylyǵymen, «Qazposhta» AQ jáne «Samuryq-Qazyna» qorymen kezdesý ótetinin atap ótti.
«Bizge Gonkongta aqsha qajet emes, reseılik te, qazaqstandyq da qarajat qajet emes dep aıta alamyn. Gonkongte aqsha jetkilikti. Biz úshin Gonkongte qurylǵan ınfraqurylymdy paıdalaný óte mańyzdy. Sebebi, kompanııalar kelip, osy ınfraqurylymdy qoldana bastaǵan soń, bizdegi jalpy ishki ónim artady. Bizdiń ekonomıkamyzdyń 95% qyzmet kórsetý ekonomıkasy quraıdy. Biz taýar shyǵarmaımyz, biz tek qyzmetter jasaımyz», - dep túsindirdi ol.
Sonymen birge, Stıven Fıllıps Gonkong ekonomıkasyna adamı resýrs tartý jumystary jóninde aıtyp berdi.
«Qazaqstan jastary úshin bul úlken múmkindik, sebebi aldaǵy 20 jylda Gonkongte bilikti jumys kúshi jetispeıdi dep boljanyp otyr, shamamen jarty mıllıon adam qajet bolady», - dep atap ótti ol.
«Belgili bir tehnologııalyq daryndardy tartý boıynsha baǵdarlamalar bar. Kvotalar jyl saıyn anyqtalady. Gonkongte jumyssyzdyq atymen joq deýge bolady, sebebi mamandardy tartý baǵdarlamasyn shekteý týraly úkimetke qysym jasalmaıdy. Bizdiń kompanııalar únemi ashyq jáne mamandar izdeýdi toqtatpaıdy», - dedi Stıven Fıllıps.
