Qazaqstandyq ındýstrııa damytý ınstıtýtynyń qurylǵanyna 1 jyl tolady
Bul týraly búgin BNews.kz ınternet portalynda ótken onlaın-suhbat barysynda Indýstrııa jáne jańa tehnologııalar ınstıtýty janyndaǵy «Qazaqstandyq ındýstrııa damytý ınstıtýty» AQ prezıdenti Meıram Qajyken málim etti. Esterińizge sala keteıik, atalǵan ınstıtýt «Ónimdilik - 2020» baǵdarlamasynyń operatory bolyp bekitilgen bolatyn.
«Endi eki kúnnen keıin Qazaqstandyq ındýstrııa damytý ınstıtýtynyń qurylǵanyna dál bir jyl tolady. Osy bir jyldyń ishinde az shara atqarylǵan joq. Eń bastysy, biz ótken jyly úsh aıdyń ishinde qazaqstandyq 150-ge tarta kásiporynǵa Dúnıejúzilik bankimen bekitilgen ádisteme boıynsha tehnologııalyq aýdıt júrgizdik», - dedi M. Qajyken. Onyń aıtýynsha, atalǵan ınstıtýt Japonııa men Koreıa ınstıtýttary úlgisinde qurylǵan. Atalmysh elderde bundaı kompanııalar ónerkásip, ónerkásiptik óndiris salalarynda tereń zertteýler jasaıdy. «Bundaı ıdeıany elimizge endirý eki jyl buryn másele bolyp kóterilgen edi. Árıne, qazaqstandyq ınstıtýt Údemeli ındýstrııalyq-ınnovatsııalyq damý baǵdarlamasymen úndesip qabyldandy. Eń basty maqsatymyz - baǵdarlamaǵa, onyń salalyq tarmaqtaryna monıtorıng jasaý. Bul óte aýqymdy shara. Máselen, bizdiń osy baǵyttardaǵy mindetterdi júzege asyrý úshin birinshi toqsan boıynsha jasaǵan esebimizdiń ózi 900 paraqshany qamtydy. Rasynda bizge keregi san emes, sapa. Sondyqtan da, bundaı esepterdi sapaly ári mazmundy etýdi qolǵa alamyz», - dedi M. Qajyken.
