Qazaqstandyq hokkeıshi reseılik klýbtyń úzdik oıynshysy atandy
ORAL. QazAqparat - Oral dopty hokkeıiniń túlegi, Qazaqstan quramasynyń kapıtany Raýan Isalıev 2016-2017 jylǵy maýsymnyń qorytyndysy boıynsha «Sıbselmash» (Novosibir) komandasynyń úzdik oıynshysy atandy, dep habarlaıdy «QazAqparat» HAA tilshisi.
Klýbtyń saıtynan alynǵan málimetke qaraǵanda, jeńimpaz jankúıerler arasynda daýys berý nátıjesinde anyqtalǵan. Barlyǵy 394 daýys qabyldanyp, qorytyndysynda jartylaı qorǵaýshy Raýan Isalıev 473 upaı jınap, ozyp shyqty. Qos qaqpashy Andreı Maslov (425 upaı) pen Igor Dolgopolov (385 upaı) ekinshi-úshinshi oryndy ıelendi.
Saıtta atalyp ótilgenindeı, Raýan Isalıev maýsym boıyna tamasha oıyn órnegin kórsetip, úzdik mergen ǵana bolyp qoımaı, pas berýde de aldyna jan salmaı, eń paıdaly hokkeıshi atanǵan.
Aıta keteıik, dopty hokkeıden Reseıdiń sýperlıgasynda óner kórsetetin «Sıbselmash» bıyl eki jyldyq úzilisten keıin shırek fınalǵa shyǵyp, onda «SKA-Neftıanık» (Habarovsk) komandasyna jol berdi. 26 naýryz kúni osy habarovskilik komanda óz tarıhynda tuńǵysh ret Reseı chempıony atandy. Al 1988 jyly Oral qalasynda dúnıege kelip, jergilikti «Aqjaıyq» komandasynyń sapynda sporttyq jolyn bastaǵan Raýan Isalıev - dopty hokkeıden Qazaqstan quramasynyń mańdaıaldy oıynshysy. 2008 jyldan reseılik klýbtarda, sonyń ishinde 2012 jyldan «Sıbselmash» quramynda oınap keledi. 2012 jyly «Start» (Nıjnıı Novgorod) komandasynyń úzdik oıynshysy bolǵan Raýan keıin «Sıbselmash» quramynda Reseı kýbogynyń kúmis júldegeri ataǵyna qol jetkizdi. Qazaqstan quramasymen birge tórt márte álem chempıonatynyń qola júldegeri, 2011 jyly Almatyda ótken qysqy Azıadanyń chempıony ári úzdik mergeni atandy.
