Qazaqstandyq grek-rımshiler Álem chempıonatynyń júldegeri atandy
ASTANA. QazAqparat - Býharest qalasynda grek-rım kúresinen 23 jasqa deıingi sportshylar arasynda ótip jatqan Álem chempıonatynda qazaqstandyq qos balýan Qaharman Qısmetov pen Amanǵalı Bekbolatov qola júldeger atandy, dep habarlaıdy QazAqparat tilshisi.
72 kg salmaqta óner kórsetetin Q.Qısmetov jartylaı fınalda grýzııalyq balýanǵa 5:7 esebimen ese jiberdi. Esesine, qola júlde úshin básekede reseılik qarsylasyn 5:0 esebimen aıqyn basymdylyqpen utty.
Q.Qısmetov 1997 jyly Batys Qazaqstan oblysy Qaztalov aýdany Aqpáter aýylynda dúnıege kelgen. Oral qalasyndaǵy sportqa daryndy balalarǵa arnalǵan mamandandyrylǵan mektep-ınternatynyń túlegi. Keıin Almatyǵa qonys aýdarǵan. Qazirgi kezde Atyraý oblysynyń atynan shyǵyp júrgen balýan 2015 jyly jastar arasynda álem chempıonatynyń kúmis júldegeri, jastar arasynda Azııa birinshiliginiń jeńimpazy, 2017 jyly eresekter arasynda QR chempıony atanyp úlgerdi.
Soltústik Qazaqstan oblysynyń ókili, 23 jasar Amanǵalı Bekbolatov Býhareste 55 kg salmaqta kilemge shyqty. Ol jarys barysynda úndistandyq jáne ýkraınalyq qarsylastaryn shań qaptyrǵanymen, jartylaı fınalda reseılikten jeńilip qaldy. Esesine qola júlde úshin kúreste japonııalyq balýandy 8:0 esebimen oısyrata utty.
Aıta keteıik, kúres túrlerinen 23 jasqa deıingi sportshylar arasynda Býhareste ótip jatqan álem chempıonaty 18 qarasha kúni márege jetedi.
