Qazaqstandyq grek-rım sheberleri Azııa birinshiligin ekinshi orynda aıaqtady
ASTANA. QazAqparat - Úndistannyń Nıý-Delı qalasynda ótip jatqan kúres túrlerinen jastar arasyndaǵy Azııa chempıonatynyń ekinshi kúni jas balýandarymyz el qorjynyna eki altyn, bir qola medal saldy, dep habarlaıdy QazAqparat tilshisi.
QR Kúres túrleri federatsııasynyń baspasóz qyzmeti málim etkendeı, alǵashqy altyndy grek-rım kúresiniń sheberi Ǵalym Qabdynasarov jeńip aldy. Ol 60 keli salmaqta el namysyn qorǵaǵan bolatyn. Otandasymyz fınalda ırandyq qarsylasyn utyp, Azııa chempıony atansa, ekinshi altyndy el qorjynyna 67 kelide kúresken balýan Mereı Bekenov saldy. Ol altyn medal úshin bolǵan beldesýde qyrǵyzstandyq balýannan aılasyn asyrdy.
Al 82 keli salmaqta kúresken Stanıslav Rylskıı Azııa chempıonatynyń qola júldegeri atandy.
Osylaısha, Azııa chempıonatynyń alǵashqy eki kúninde bozkilemde beldesken grek-rım kúresiniń balýandary jarysty aıaqtady.
Esterińizge sala keteıik, keshe grek-rım kúresinen jas balýandarymyz jarystyń alǵashqy kúni 4 medal jeńip alǵany týraly aıtqan bolatynbyz. Mine, jarystyń eki kúnnen keıingi nátıjesin qosa eseptegende Qazaqstannyń jas balýandary 2 altyn, 5 qola medalmen komandalyq esepte ekinshi orynǵa ıe boldy. Birinshi orynda - Iran. Úzdik úshtikti Qyrǵyzstan balýandary qorytyndylady. Búgin bozkilemge erkin kúres sheberleri shyǵady.
