Qazaqstandyq grek-rım kúresiniń sheberleri
ALMATY. Qańtardyń 10-y. QazAqparat /Erlik Erjanuly/ - Qańtardyń 16-17-si kúnderi Reseıdiń Tıýmen qalasynda grek-rım kúresinen "Ivan Poddýbnyıdi eske túsirýge arnalǵan dástúrli halyqaralyq Gran-prı týrnıri ótedi,
dep habarlaıdy QazAqparat QR Grek-rım, erkin jáne áıelder kúresi federatsııasynyń ınternet saıtyna silteme jasap.
Bas bapker Muratbek Qasymhanov bul dúbirli dodaǵa 14 balýandy alyp barmaq. Onda el namysyn Ashat Qudaıbergenov, Marat Garıpov (55 kg), Almat Kebisbaev, Eldar Qaıratov, Erbol Qońyratov (60 kg), Aıbek Eńsehanov, Beıbit Nuǵymanov, Shyńǵys Qaıyrmaǵambetov (66 kg), Andreı Samohın, Alhazýr Ozdıev (84 kg), Áset Mámbetov (96 kg) pen Nurmahan Tinálıev (120 kg) qorǵamaq. Baǵdarlama boıynsha qańtardyń 14-i kúni onda delegatsııalar kútip alynyp, 15-i kúni jarysqa qatysýshylar medıtsınalyq tekserýden ótip, salmaqtaryn ólsheıdi. Senbide 55, 66, 84 jáne 120 keli salmaqtaǵy balýandar beldesip, jeńimpazdar marapattalady. Al jeksenbi kúni 60, 74 jáne 96 kelidegi úzdikter anyqtalady.
