Qazaqstandyq gımnast Chehııada ótken Gran-prıde qola júlde aldy
ASTANA. QazAqparat – Qazaqstandyq gımnastshy Sabına Bakatova Chehııanyń Brno qalasynda ótken Gran-prı jarysynyń kezeńinde júldeli boldy, dep habarlaıdy QazAqparat Sports.kz saıtyna silteme jasap.
Sabına Bakatova Chehııada kórkem gımnastıkadan ótken Gran-prıdiń kezeńinde lentamen óner kórsetip, «qola» aldy. «Altyndy» slovenııalyq gımnastshy Ekaterına Vedeneeva, al «kúmisti» frantsııalyq Lılı Ramonacho aldy.
18 jastaǵy gımnastshy qyz halyqaralyq dárejedegi sport sheberi. Bıyl naýryz aıynda ol Gretsııada ótken tanymal Afrodıta kýbogy týrnırinde qola medaldy jeńip alǵan bolatyn.
