Qazaqstandyq gımnasshylar Álem kýbogyna qyzý daıyndyq ústinde
Qazaqstan quramasynyń bas bapkeri Aleksandr Kım aıtpaqshy, qazir komanda Álem kýbogy aldyndaǵy oqý-jattyǵý jıynyn ótkizip jatyr. Qazaqstan quramasy sapynda Karımı Mılad, Musaev Ákim, Qurbanov Narıman, Jantikov Erbol jáne Patanın Dmıtrıı óner kórsetedi.
«Osy týrnır 2020 jyly Tokıoda ótetin Olımpıada oıyndaryna joldama beredi. Ereje boıynsha, snarıadta ár elden 2 gımnast óner kórsetedi. Qazaqstandyq sportshylardan: M. Karımı jáne D. Patanın erkin jattyǵýda, qoldy tirep sekirý jattyǵýynda, N. Qurbanov pen Á. Musaev at snarıadynda, E. Jantikov pen M. Karımı qossyryq, mańdaısha jattyǵýlarynda, D. Patanın sheńber jattyǵýynda óner kórsetedi», - deıdi A. Kım.
Bapker snarıadtardyń barlyǵynda qazaqstandyq gımnastshylar álemdik gımnastıkanyń kóshbasshylarymen básekeles bolatynyn atap ótti. N. Qurbanovtyń at snarıadyndaǵy jattyǵýlaryna úlken úmit artylyp otyr. Erkin baǵdarlama jáne mańdaıshadaǵy jattyǵýlarda M. Karımı, at snarıadynda jáne qossyryq jattyǵýynda Á. Musaev, qossyryq pen mańdaıshada óner kórsetetin E. Jantikovke de bapkerler senim bildirip otyr.
«Quramanyń eń jas múshesi Dmıtrıı Patanın erkin jattyǵý men qoldy tirep sekirýde jaqsy nátıjege jetedi dep kútemiz», - dedi ol.
Budan tys, bapkerdiń aıtýynsha, Bakýdegi týrnır aıaqtalǵan soń Karımı Mılad, Qurbanov Narıman, Jantikov Erboldan quralǵan Qazaqstan komandasy taǵy bir Álem kýbogyna qatysý úshin Doha qalasyna attanady.
Avtor: Bekbaý Taımanov
