Qazaqstandyq geofızıka kompanııasy alǵash ret Avstralııada paıdaly qazbalardy zertteýge kiristi
Aerogeofızıkalyq jumystar MobileMT tehnologııasy boıynsha mobılızatsııalanǵan aspaly júıesi bar jeńil kópmaqsatty Eurocopter tikushaǵynyń kómegimen júrgizilip jatyr.
Ushaq shamamen 150 metr bıiktikten 1500 metrge deıingi tereńdikti zerttep, paıdaly qazbalardyń (altyn, mys, polımetall jáne KSSh) oshaqtaryn izdeıdi.
Atalǵan MobileMT tehnologııasy Jezqazǵan, Aqmola jáne Shyǵys Qazaqstan oblystarynda ken oryndaryn tabýǵa kómektesken bolatyn. Sondyqtan óz kezeginde elimizdegi taý-ken óndirýshi kompanııalardyń qorlarynyń artyp, damýyna septigin tıgizetini anyq.
Joǵary bilikti mamandary jáne ınnovatsııalyq geofızıkalyq qurylǵylary bar bul kompanııa Qazaqstan aýmaǵyndaǵy geologııalyq barlaý jumystaryn sátti júrgizip jatyr. Az ýaqytta ol shetel naryǵynda úlken suranysqa ıe boldy.
Qazaq Geophysics qajetti aımaqtardy anyqtaý úshin geofızıkalyq derekter jınaýǵa jáne olardy aýqymdyraq jumystarǵa, burǵylaýǵa daıyndaý úshin Batys Avstralııanyń úsh aýmaǵyn ushaqpen zerttep shyqpaq.
«Bul tehnologııanyń tıimdiligi bizdiń Kanada jáne Latyn Amerıkasyndaǵy seriktesterimizdiń jumysynan baıqaldy, ótken jyly onyń múmkindigin óz elimizde de kórdik. Avstralııa naryǵynda álemdik deńgeıde tanymal kompanııalarmen birge jumys isteý biz úshin úlken jetistik. Osyndaı iri jobalardy júzege asyrý úshin óz mamandarymyzdy eń úzdik tehnologııalarǵa úırettik. Sondaı aq bul jobaǵa MobileMT qurastyrýshylaryn, Qazaqstanda jumys istep júrgen kanadalyq Expert Geophysics kompanııasyn da tarttyq», - dedi Qazaq Geophysics Bas dırektory Ǵalym Nurjanov.
Ǵ.Nurjanovtyń aıtýynsha, mundaı tehnologııalardy qoldanǵannan keıin tapsyrys berýshiler barlaý jumystarynan oń nátıjelerge qol jetkizedi, sodan soń Australian Securities Exchange (AXS) qor bırjasyndaǵy aktsııalardyń da birneshe esege ósýine yqpal etedi.
Joba barlyq túsindirme jumystaryn eseptegende Avstralııada osy jyldyń aıaǵyna deıin júzege asady.
2023 jyly Qazaq Geophysics elektro jáne magnıtobarlaý kólemi 21 000 esepti shaqyrym, 30 000 esepti shaqyrym aerogeofızıkalyq zertteýlerdi jáne shamamen jerasty taý qazbalarynyń 7 mln sh.m. 3D túsirilimin quraıtyn 10-nan asa jobaǵa qatyspaq.
Aıta keteıik, Qazaq Geophysics 2021 jyldyń mamyrynda quryldy. Kompanııa aerogeofızıka, jerústi geofızıka (magnıtobarlaý, elektrobarlaý) salalaryndaǵy eń zamanaýı qurylǵylardy jáne jerasty taý qazbalarynyń 3D túsirilimderin qoldaný arqyly, geofızıkalyq jumystar keshenin oryndaıdy. Bul mindetterdi oryndaý úshin Qazaq Geophysics-te joǵary bilikti mamandardan quralǵan shtat, óziniń avıatsııalyq parki (tikushaqtar, ushaqtar, kvadrokopterler, ushqyshsyz ushý apparaty), sondaı-aq mamandandyrylǵan jáne qosymsha tehnıkalary bar. Bıylǵy jyly Qazaqstannyń bes oblysynda aerogeofızıkalyq zertteýler júrgizdi.
