Qazaqstandyq gematologtar bedeldi eýropalyq uıymnyń músheligine endi
ASTANA. 24 qyrkúıek. QazAqparat - Respýblıkalyq jedel medıtsınalyq járdem ǵylymı ortalyǵy Kemik maıyn transplanttaý eýropalyq qoǵamynyń (EBMT) múshesi boldy, dep habarlaıdy QR Densaýlyq saqtaý mınıstrliginiń baspasóz qyzmeti.
Vedomstvonyń málim etkenindeı, bul uıymǵa múshelikke ótý qazaqstandyq gematolog mamandar úshin úlken múmkindikter bermek. Nátıjesinde leıkoz dertine shaldyqqan naýqastardyń barlyǵyna kemik maıy transplantatsııasy operatsııalaryn shetelderge barmaı-aq óz elimizde jasaýǵa qol jetkiziletin bolady.
"Otandyq dárigerler endi Eýropanyń jetekshi medıtsınalyq uıymdarynda biliktilikterin kóterip, gemopoetıkalyq jasýshalardy transplanttaý salasynda jumys isteıtin Eýropanyń jetekshi kásipqoı mamandarymen tájirıbe almasatyn bolady. Eń bastysy, mundaı yntymaqtastyq kemik maıy donorlarynyń biregeı tirkelimin jasaýǵa kómektesedi. Respýblıkalyq jedel medıtsınalyq járdem ǵylymı ortalyǵy dárigerleri jylyna 50 transplantatsııaǵa deıin jasaýdy josparlap otyr", - delinedi mınıstrliktiń habarlamasynda.
Kemik maıyn transplanttaý eýropalyq qoǵamy - (EBMT) kemik maıyn transplanttaý máselelerimen aınalysatyn bedeldi uıym. EBMT uıymynda álemniń 58 elinde ornalasqan 600-deı medıtsınalyq ortalyqtyń 4 myńnan astam múshesi bar. Qoǵam ǵalymdar men klınıtsıst mamandar arasynda ujymdyq zertteý uıymdastyrý jáne tájirıbe almasýǵa múmkindik jasaý maqsatynda 1974 jyly quryldy. Kemik maıyn transplanttaý eýropalyq qoǵamy qyzmetiniń negizgi baǵyttarynyń biri - kemik maıyn tranplanttaý salasyndaǵy úrdisterdi saraptap, málimetter jınaý.
Eske sala keteıik, Onkogematologııa jáne kemik maıyn transplanttaý jónindegi eýropalyq kongress jumysy barysynda Respýblıkalyq jedel medıtsınalyq járdem ǵylymı ortalyǵynda Qazaqstanda alǵash ret álemdik standarttarǵa tolyq jaýap beretin gemoblastozdar, qan óndirim depressııasy jáne STK bólimshesi ashyldy.
