Qazaqstandyq ǵaryshkerdiń ushý sapary memleketke 20 mln. AQSh dollaryna túspek - E. Shaımaǵambetov
Bul týraly búgin Almatyda jýrnalıstermen bolǵan kezdesýde QR Investıtsııalar jáne damý mınıstrligi Aeroǵarysh komıteti tóraǵasynyń orynbasary Erkin Shaımaǵambetov málim etti.
«Bul qarajatqa reseılik taraptyń bizdiń ǵaryshkerdiń ushý saparyn qamtamasyz etý boıynsha barlyq shyǵyndary óteledi. Qazir reseılik taraptyń surap otyrǵany somasy - 1 mlrd. 100 mln. rýbldi quraıdy. Bul búgingi baǵammen qaraǵanda shamamen 20 mln. AQSh dollary bolady», - E. Shaımaǵambetov.
Ol sonymen qatar, ústimizdegi jylǵa arnalǵan respýblıkalyq bıýdjette bul qarjynyń qarastyrylmaǵanyn jetkizdi.
«Sondyqtan, bul aqshany Qazaqstannyń 2016 jyly tóleıtindigi jóninde ortaq kelisimge qol jetkizildi. Óteýdiń ár túrli joldary qaralý ústinde. Mysaly jaldyq tólem nemese basqa da qarjy kózderi arqyly tóleý múmkindikteri talqylandy. Qazir bul másele QR Úkimetinde jan-jaqty qarastyrylyp jatyr. Biz Qarjy mınıstrligimen tyǵyz baılanysta jumys istep jatyrmyz», - dedi E. Shaımaǵambetov.
