Qazaqstandyq ǵaryshker qytaı ekıpajy quramynda ǵaryshqa attanýy múmkin
Bul týraly «Kazahstanskaıa pravda» gazetine suhbat bergen atalǵan agenttiktiń tóraǵasy Talǵat Musabaev málim etti.
«Beıjińde ótken 64-shi halyqaralyq astronavtıka kongresi aıasynda men Qytaı ulttyq ǵarysh ákimshiliginiń basshysy Ma Sınjýmen kezdestim. Sol kezde men basqarylatyn kosmonavtıka jáne qytaı ekıpajy quramynda qazaqstandyq ǵaryshkerdiń ushý múmkinshiligin kóterdim. Meniń áriptesim bizderdiń yntymaqtastyǵymyzda basqarylatyn kosmonavtıka salasynda esh problema joqtyǵyn ári bul máseleni qytaı tarapy qarastyratyndyǵyn aıtty», - dedi T.Musabaev.
Degenmen onyń aıtýynsha, 2016-2017 jyldary aralyǵynda Halyqaralyq ǵarysh stansasyna qazaqstandyq ǵaryshkerdiń ushýy máselesi boıynsha Resǵaryshpen naqty jáne maqsatty jumystar júrgizilýde. Osy ýaqytqa deıin Qazǵarysh Halyqaralyq ǵarysh stansasy ekıpajynyń quramyna qazaqstandyq ǵaryshkerdiń enýi úshin barlyq jumystardy atqardy.
«El Prezıdenti Nursultan Nazarbaev bul jaıynda Vladımır Pýtınmen jáne Dmıtrıı Medvedevpen 2 márte sóılesti. 2009 jyly bizdiń ǵaryshkerdiń Halyqaralyq ǵarysh stansasyna ushý múmkinshiligi bolǵan edi. Ushý kestesi birneshe jyl buryn aldyn ala jasalady. Al Qazaqstan HǴS baǵdarlamalaryna qatyspaıdy. 5 jyl buryn kemede bir bos oryn boldy. Reseılik áriptesterdiń kelisimimen bul oryndy Qazaqstan azamaty ıelene alar edi. Kelisimshartqa baılanysty 1 jyl jumystar júrgizilip, oǵan men jáne Resǵarysh basshysy qol qoıdy. Degenmen bıýdjetten 30 mln. dollar aqsha tabylmady», - dedi T.Musabaev.
