Qazaqstandyq ǵalymnyń ǵylymı eńbegine suranys artýda
ASTANA. QazAqparat - Qazaqstandyq ǵalymnyń ǵylymı eńbegine suranys artty, dep habarlaıdy QazAqparat.
Álemdegi eń iri «Springer Nature» baspa úıiniń málimeti boıynsha, ál-Farabı atyndaǵy QazUÝ rektory, akademık Ǵalym Mutanovtyń «Mathematical Methods and Models in Economic planning, Management and Budgeting» («Ekonomıkalyq josparlaý, basqarý jáne bıýdjetteýdegi matematıkalyq ádister men úlgiler») monografııasy eń kóp suranysqa ıe bolyp, tanymaldyǵy artyp keledi.
Ǵ.Mutanovtyń ǵylymı jumysy 2017 jyly baspa úıiniń eń áıgili kitaptar qataryna engen, al onyń elektrondyq nusqasyn 13 myńǵa jýyq qoldanýshy kóshirip alǵan. Bul baspa úıiniń eń úzdik kórsetkishteriniń biri. Mundaı joǵary reıtıng atalmysh zertteýdiń ózektiligin jáne qazaqstandyq ǵalymnyń ǵylymı jumysynyń joǵary halyqaralyq deńgdeıde moıyndalýyn baıqatady.
Monografııa óz kezeginde ekonomıka boıynsha Nobel syılyǵynyń laýreaty Djon Nesh tarapynan joǵary baǵalanyp, áleýmettik-ekonomıkalyq júıelerdi modeldeý jáne basqarý boıynsha eń úzdik jumys retinde «Springer Nature» kompanııasy tarapynan Germanııadaǵy «Frankfurter Buchmesse» halyqaralyq kitap kórmesinde tanystyrylǵan.
Qarjy jáne ekonomıka ǵylymdarynyń sońǵy úrdisteri halyqaralyq jýrnalynda (IJLTFES) Lıssabon ýnıversıtetiniń tanymal ǵalymy, professor Manýel Alberto M. Ferreıra bul monografııa ekonomıst, matematık, praktık jáne basshylar úshin asa mańyzdy ári taptyrmaıtyn ǵylymı jumys ekenin atap ótken.
