Qazaqstandyq ǵalymdarǵa FP7 baǵdarlamasy boıynsha óz jańalyqtaryn Eýropada júzege asyrýǵa múmkindik bar
ALMATY. Tamyzdyń 19-y. QazAqparat /Erbol Azanbek/ - Búgin Almatyda «Eýroodaqtyń ǵylymı-tehnıkalyq damý jáne FP7 ınnovatsııalar baǵdarlamasy boıynsha jetinshi aralyq baǵdarlamaǵa qatysý» atty ǵalymdarǵa arnalǵan ekikúndik semınar bastady,
dep habarlaıdy QazAQparat.
Sharanyń maqsaty- ǵalymdarǵa kásibı kómek berý joldaryn damytý. FP7 Eýropanyń ǵylymı keńistiginiń negizgi qazyǵy bolyp sanalady. Baǵdarlama ýnıversıtetterden bastap bilim berýshi shaǵyn uıymdar, jeke ǵalymdarǵa deıin qoldaýdy uıymdastyrady. Baǵdarlamanyń Qazaqstandaǵy Ulttyq úılestirýshisi Kamıla Maǵzıevanyń aıtýynsha, ǵylym eshqashan bir ǵana eldiń sheńberinde damyǵan emes.Sondyqtan atalǵan baǵdarlama Eýroodaq kóleminde damytylyp, 1994 jyldan bastap úshinshi elderge taratyla bastaǵan. «Bul baǵdarlama ǵylymdy damytýda óte qajet. Máselen, Eýroodaq osy baǵdarlama aıasynda qazirgi zamannyń ózekti máseleleriniń sheshilýine belsendi túrde atsalysyp otyr. Máselen «qus tumaýy», Meksıka shyǵanaǵyndaǵy munaı apatyna baılanysty tehnologııa jasaý týraly jedel konkýrstar uıymdastyryldy», deıdi ol. Onyń aıtýynsha, bul baǵdarlama arqyly qazaqstandyq ǵalymdardyń da óz jobalaryn álemdik deńgeıde júzege asyrýǵa múmkindigi bar.
Almaty tehnologııa ýnıversıtetiniń prorektory Serik Túmenovtyń aıtýynsha, Qazaqstandyq ǵalymdardyń bul baǵdarlamaǵa qatysý áleýeti joǵary. Baǵdarlamanyń ózektiligi ulttyq basymdylyqtardy qoldaýǵa, damytýǵa múmkindik beretindigi. Sondaı-aq Qazaqstandyq ǵalymdardyń eńbekterin eýropalyq deńgeıge kóterýge jaǵdaı jasalmaq.
«Sondaqtan, búgingideı semınar óte qajet», deıdi Serik Túmenov. Semınar barysynda qazaqstandyq ǵalymdarǵa FP7 baǵdarlamasynyń ózektiligi, talaptary týraly maǵlumat berilip, óz jobalaryn usynýǵa bolatyn sheteldik uıymdar tanystyryldy.
