Qazaqstandyq ǵalymdarǵa ataýly syılyqtar tabystaldy

ASTANA. QazAqparat - Búgin Bilim jáne ǵylym mınıstri Erlan Saǵadıev jeti ǵalymǵa ǵylym salasyndaǵy memlekettik syılyqtar tabystady. Saltanatty shara barysynda Ratbaı Myrzaqulov, Maınur Bóribaeva, Gúlnas Ahmetova, Kúlásh Nurymjanova, Maksım Zdorovets, Olga Andrıýşenko jáne Nurken Kúzembaev qoǵam men memleket aldyndaǵy eńbegi úshin joǵary marapatqa ıe boldy, dep habarlaıdy mınıstrliktiń baspasóz qyzmeti.

«Barshańyzdy Táýelsizdiktiń 25 jyldyǵymen quttyqtaımyn! Memleket basshysy Nursultan Nazarbaevtyń tapsyrmasymen Qazaqstanda ǵylym men bilim salasynda belsendi jumystar júrgizilýde. Búgin Qazaqstannyń ǵylym salasyndaǵy belgili ǵalymdar men qaıratkerleri marapattaldy. Bárińizge baqyt tileımin, Otanymyz tynysh bolsyn», - dedi Erlan Saǵadıev.

 

Bıyl syılyqqa 75 ǵalym-úmitkerdiń jumystary usynyldy. Olardyń árqaısysy óziniń qyzmet salasynda qyzyqty zertteý jumysyn júrgizgen. Biraq saraptamalyq taldaý men komıssııanyń talqylaýlarynan keıin eń úzdik 6 jumys tańdap alyndy.

Ǵalymdar eńbekteri úshin 150 AEK mólsherinde M.O. Áýezov pen D.A. Qonaev atyndaǵy memlekettik syılyqqa, sondaı-aq, 350 AEK mólsherinde Q.I. Sátbaev, Sh.Sh. Ýálıhanov, Y. Altynsarın, Kúltegin atyndaǵy memlekettik syılyqtarǵa ıe boldy.

 

«Biz jeńiske jetkenimizge qýanyshtymyz. Qatty tolqyp turmyn. Barlyǵyńyzdy kele jatqan Táýelsizdik kúnimen quttyqtaımyn, táýelsizdik - bul baqyt, barshańyzǵa densaýlyq pen baqyt tileımin. Keremet qoǵamda jáne memlekette turyp jatqanymyz úshin Elbasymyzǵa rahmet», - dedi professor, S. Toraıǵyrov atyndaǵy Pavlodar memlekettik ýnıversıtetiniń pedagogıka ǵylymdarynyń doktory Gýlnas Ahmetova.

 

«Men óte qýanyshtymyn, búgingi kún men úshin asa mańyzdy. Bul syılyqty stýdent kezimnen armandaǵam. Mine, endi qolym jetti. Otanymyzdyń ıgiligi úshin zertteýlerdi jalǵastyratyn bolamyz. Barsha qazaqstandyqtardy uly merekemen quttyqtaımyn. Tarıhshy retinde táýelsizdikke qalaı qol jetkizgenimizdi jáne táýelsizdiktiń qanshalyqty mańyzdy ekenin bilemin», - dedi Pavlodar memlekettik pedagogıkalyq ınstıtýtynyń «Qazaqstan men shet memleketter tarıhy» kafedrasynyń dotsenti Nurken Kúzembaev.

 

Elimizde ataýly syılyqtar 2010 jyldan bastap tabystalyp keledi. Jyl saıyn alty ǵalym marapattalady jáne 75 memlekettik ǵylymı stıpendııa beriledi. Sonymen qatar, bıyl 25 jetekshi jáne 50 jas talantty ǵalym memlekettik ǵylymı stıpendııaǵa  ıe boldy. Stıpendııa 2017 jyldyń qazan aıyna deıin aı saıyn tólenedi.

 

Sonymen qatar, Bilim jáne ǵylym mınıstriniń qurmet gramotasymen jáne baǵaly syılyqtarmen baǵdarlama jasaýdan 17-shi Búkilreseılik komandalyq olımpıadanyń jeńimpazdary, Astana jáne Almaty qalalarynyń Bilim-ınnovatsııa lıtseıleriniń oqýshylary Sanjar Bıdaıbek, Ashat Jalǵasov pen Nurbaqyt Madıbek marapattaldy.