Qazaqstandyq ǵalymdardy granttyq qarjylandyrýǵa $30 mln. bólinip otyr
ASTANA. QazAqparat - QR Bilim jáne ǵylym mınıstrligi Dúnıejúzilik Bankpen birge qazaqstandyq ǵalymdardy granttyq qarjylandyrý jobasyn qolǵa aldy, dep habarlaıdy QazAqparat.
2016 jyldyń 2 aqpanynda Qazaqstan Respýblıkasynyń Parlamenti «Ónimdi ınnovatsııalardy yntalandyrý» jobasy aıasynda Qazaqstan Respýblıkasy men Dúnıejúzilik Damý jáne Qaıta Qurý bankiniń arasynda jasalǵan qaryz alýǵa baılanysty kelisimdi ratıfıkatsııalady.
Búgin Astanada «Ónimdi ınnovatsııalardy yntalandyrý» jobasyn basqarý toby tóraǵasynyń orynbasary Murat Sartbaev atalmysh joba jaıynda aıtyp berdi.
Onyń aıtýynsha, granttyq jobaǵa 30 mıllıon AQSh dollary bólinip otyr. Baǵdarlama aıasynda 60-70 tehnologııalyq startap qurylady dep kútilýde. Sonymen qatar doktorant mamandardy shetelde tájirıbeden ótkizýge Dúnıejúzilik bank 10 mıllıon AQSh dollaryn bólip otyr. Al ınnovatsııalyq konsortsıýmdardy qarjylaı demeýge 35 mıllıon AQSh dollary kóleminde grant berilmek.
«Ónimdi ınnovatsııalardy yntalandyrý» jobasyn iske asyrý sheńberinde úsh granttyq baǵdarlama qolǵa alyndy. Olar: Aǵa ǵylymı qyzmetkerler toby jáne Kishi ǵylymı qyzmetkerler toby úshin grantttar baǵdarlamasy. Úshinshisi - konsortsıýmdardy damytý granttyq baǵdarlamasy. Ol óz kezeginde jyldyń sońynda bastalady. Byltyr Aǵa ǵylymı qyzmetkerler toby jáne Kishi ǵylymı qyzmetkerler toby úshin grantttar baǵdarlamasynyń birinshi kezeńi ótti. 451 ótinishten 33 joba qarjylandyrýǵa ıe boldy. Búgingi tańda olardyń birnesheýi júzege asyp otyr. Bıyl atalmysh baǵdarlama aıasynda 400-den astam ótinish keldi», - dedi ol.
Onyń sózinshe, Qazaqstan Úkimeti men Dúnıejúzilik Banktiń ortaq jobasy basty ulttyq ınnovatsııalyq júıeniń ınstıtýttarynyń áleýetin arttyrýǵa, ınnovatsııalyq jobalar men tehnologııalyq startaptardy qoldaý irikteý jáne naryqtyq tańdaý mezanızmin engizýge, sondaı-aq, jeke sektorlardy qatysýǵa yntalandyrýǵa baǵyttalǵan.
Joba maqsaty - joǵary sapaly, memleket úshin asa mańyzdy zertteýlerdi yntalandyrý jáne tehnologııalardy kommertsııalandyrý.
Úmitkerlerdi irikteý jáne jobalardy baqylaý jumysyn Ǵylym jáne kommertsııalandyrý jónindegi Halyqaralyq keńes júrgizetindigin atap ótken jón. Baǵdarlama qazaqstandyq ǵalymdar men konsortsıýmdardyń ǵylymı- zertteýler nátıjelerin kommertsııalandyrýǵa baǵyttalǵan.
«Granttyń kólemi Aǵa ǵylymı qyzmetkerler toby úshin 230 mln. teńgeden, Kishi ǵylymı qyzmetkerler toby úshin 180 mln. teńgeden aspaýy tıis. Biz tek zerthanalyq zertteýleri aıaqtalǵan jobalardy qarjylandyramyz. Sonymen qatar basymdyq ónerkásiptik zertteýlerge beriledi. Jobanyń sońǵy nátıjesi satylymǵa shyǵý, jeke menshik sektor ınvestıtsııalary nemese lıtsenzııalyq kelisimder jasasý arqyly 3-shi jyldyń sońyna qaraı kompanııany ózin-ózi qamtamasyz etýge jetkizý», - deıdi M. Sartbaev.
Jalpy, aıta ketken jón, Búkilálemdik bankta jobalardy qarjylandyrýdyń sátti tájirıbesi bar. 2011-2015 jyldar aralyǵynda 65 tehnologııalyq startap qarjylandyryldy. Olardyń ishinde 40 joba óz ónimderin naryqqa shyǵardy.
