Qazaqstandyq ǵalymdar Úndistan arhıvterinde jumys júrgizedi

NUR-SULTAN. QazAqparat - 2022 jyly Qazaqstannyń mádenıet jáne sport mınıstri Dáýren Abaev pen Úndistannyń Mádenıet mınıstri Meenakshı Lekhı mádenı almasý baǵdarlamasyna qol qoıǵan bolatyn. Osy Kelisim aıasynda elimizdiń Qoljazbalar jáne sırek kitaptar ulttyq ortalyǵynyń qyzmetkerleri Úndistannyń arhıvteri men kitaphanalarynda ǵylymı jumys júrgizý múmkindigine ıe boldy.

«Úndistan arhıvterinde ata-babalarymyzdyń tarıhyna jaryq túsiretin kóptegen tyń materıaldar bar. Ásirese qazaqtardyń Úndistanǵa kóshýi jáne olardyń osy eldiń aýmaǵyna qonystanýy, qazaqtardyń Tıbetten Kashmırge kirýi jáne taǵy basqa da qundy qujattardy atap ótý lázim. Aýqymdy qujat bazasyna qol jetkizgen otandyq ǵalymdardy arhıv materıaldaryn júıeleý, katalogtaý, aýdarý syndy úlken jumystar kútip tur», - dedi Qoljazbalar jáne sırek kitaptar ulttyq ortalyǵynyń dırektory Jandos Boldyqov.

Onyń aıtýynsha, qazaqstandyq tarap Úndistan Ulttyq arhıviniń basshylyǵymen kelissózder júrgizip, onyń qorytyndysy boıynsha Úndistan muraǵattarynda ǵylymı-zertteý jumystaryn bastaý týraly qaǵıdatty kelisimderge qol jetkizgen.

Qazirgi ýaqytta Úndistanda is-saparda júrgen qazaqstandyq delegatsııa arhıvtiń restavratsııa, tsıfrlandyrý bólimderiniń qyzmetimen tanysty. Ǵylymı top tarıhı qujattardy izdeý jumystaryn júrgizedi.