Qazaqstandyq ǵalymdar tuzdy topyraqta ósimdik ósirýge múmkindik beretin nanoqum oılap tapty
ASTANA. QazAqparat - Qazaqstandyq ǵalymdar nanotehnologııalar negizinde birqatar biregeı quraldar men materıaldar jasamaq.
Bul týraly primeminister.kz habarlady.
Qazaqstandyq ǵalymdar jeke ázirlengen nano-sorǵy shyǵarýǵa jaqyn, ol osy sektordaǵy kóshbasshy kompanııalardyń balamaly ázirlemelerinen tehnologııasy boıynsha asyp túsýi múmkin, dep habarlady búgin AQSh Argonn ulttyq zerthanalary professory, Nazarbaev Ýnıversıteti professory Zınetýlla Insepov.
«Maǵan osynda Nazarbaev Ýnıversıtetinde nano-sorǵy dep atalatyn qural jasaýdy usyndy. Bul sorǵy dıametri birneshe nanometrden bastap mıkronǵa deıingi arnalar úshin jumys jasaıdy, ol arqyly suıyqtyq ta, gaz da óz betinshe óte almaıdy», - dedi Z.Insepov.
Ol qural biregeı, óte berik jáne ıilgish, bolattan 200 ese berik grafen negizinde nanomaterıaldan jasalatynyn aıtty. Qazirgi tańda qazaqstandyq ınnovatorlar grafenniń úlken paraqtaryn jasaýǵa paıdalanatyn tehnologııalar, professordyń aıtýynsha, osy sektorda kósh bastap turǵan Ońtústik Koreıa kompanııalarynyń ázirlemelerinen asyp túsedi.
Sondaı-aq, ǵalym Nazarbaev Ýnıversıteti zerthanasynda nano-qum jasaý boıynsha jumys júrgizilip jatqanyn málimdedi.
«Jaqynda biz jańa materıal - nanoqum jasap shyǵardyq. Ol tuzdy topyraqta ósimdikter ósirýge jáne olardy tuzdy sýmen sýarýǵa múmkindik beredi. Eger mundaı tehnologııany qoldansaq, bul aýyl sharýashylyǵynda revolıýtsııa bolmaq. Mysalǵa, Qazaqstanda Aral mańynda tuqym sebýge bolatyn keń aýmaq bar, onda nanoqumdy paıdalanýmen aýyl sharýashylyǵy daqyldaryn ósirýge bolady», - dep tolyqtyrdy Z.Insepov.
Ol Nazarbaev Ýnıversıtetinde ǵalymdar nano qabyqsha jasaýmen aınalysyp jatqanyn, ol joǵary kerneýli elektr jelileriniń tesilýiniń aldyn alýǵa múmkindik beretinin málimdedi.
