Qazaqstandyq ǵalymdar Qytaı kompanııasynyń ókilderimen kezdesti
Qazaqstannyń jetekshi joǵary oqý orny bolyp tabylatyn ál-Farabı atyndaǵy QazUÝ, Qytaı seriktesterimen joǵary tehnologııalar salasyndaǵy yntymaqtastyqty odan ári keńeıtýde. QazUÝ rektory, akademık Ǵalym Mutanov bastaǵan delegatsııanyń Beıjiń qalasyna jumys sapary barysynda belgili joǵary tehnologııalyq kompanııalardyń ókilderimen kezdesýler ótti.
Aıta keterlik jaıt, Qytaıdyń halyqaralyq yntymaqtastyq jáne damý jónindegi memlekettik agenttik ókilderi QazUÝ-ǵa jýyrda kelgende JOO-nyń ІT-ınfraqurylymy men kadrlar daıarlaý deńgeıine, sondaı-aq ýnıversıtettiń ǵylymı-zertteý áleýetine joǵary baǵa berdi. Sýperkompıýter men IT-tehnoparkin ornalastyrýǵa arnalǵan nysandardyń daıyndyq barysymen tanysqannan keıin, olar jobanyń sátti júzege asyrylatynyna senim bildirdi.
Qazaqstan Respýblıkasynyń Prezıdenti Qasym-Jomart Toqaevtyń Qytaıǵa is-sapary qarsańynda QazUÝ delegatsııasy Beıjińde QHR úkimet granty boıynsha usynylatyn sýperkompıýterdi jetkizý jobasy boıynsha bas qosty. QHR kommertsııa mınıstrliginiń ókilderimen jáne basqa da seriktestermen ǵylymı-tehnıkalyq yntymaqtastyqty keńeıtý, sondaı-aq qazaqstandyq JOO bazasynda jańa Jibek joly ýnıversıtetteriniń halyqaralyq Alıansynyń IT-tehnoparkin qurý jobasyn júzege asyrý máseleleri talqylandy.
Beıjińdegi kezdesýler barysynda ónimdiligi joǵary serverler men derekterdi saqtaý júıelerin birlesip ázirlep shyǵarý jobasyn júzege asyrý, sonymen qatar sýperkompıýterlik esepteýler men Big data salasyndaǵy zertteýler júrgizý máseleleri qarastyryldy. Osyndaı jobalardyń tabysty júzege asyrylýy «Tsıfrlyq Qazaqstan» memlekettik baǵdarlamasyn oryndaýǵa yqpal etip, eldiń ekonomıkasyn jańǵyrtý jáne ǵylymdy qajetsinetin tehnologııalar salasyn damytý draıverleriniń biri bolady.
Sondaı-aq, QazUÝ delegatsııasy QHR Ǵylym akademııasynyń Jerdi qashyqtyqtan zondtaý (JQZ) ınstıtýtynyń ókilderimen kezdesti. QazUÝ-da ashylǵan Qazaqstan-Qytaı JQZ birlesken ortalyǵyn odan ári damytý jóninde kelisimge qol jetkizildi. Jańa oqý jylynan bastap magıstranttar men doktoranttar QHR Ǵylym Akademııasynyń aeroǵaryshtyq aqparat ǵylymı-zertteý ınstıtýtynda ǵylymı taǵylymdamadan ótetin bolady.
JQZ ortalyǵy ýnıversıtettiń sandyq maqsatty jobasy bolyp tabylady, onyń jumysy qoldanbaly, tehnologııalyq, ǵylymı jáne bilim berý mindetteriniń keń spektrin sheshýge baǵyttalǵan. Qazirgi ýaqytta QazUÝ-dyń jas ǵalymdary men stýdentteri QHR Ǵylym Akademııasynyń aeroǵaryshtyq aqparat ǵylymı-zertteý ınstıtýtynda bilim alyp, taǵylymdamadan ótýde. Aldyńǵy qatarly tsıfrlyq tehnologııalardy transfertteý men paıdalaný jergilikti jerdiń ǵaryshtyq túsirilimderin, geologııada jáne kartaǵa túsirý kezinde zertteýler júrgizý, tabıǵı jáne tehnogendik sıpattaǵy jaǵdaılardy boldyrmaý, qorshaǵan orta monıtorıngi jáne taǵy basqa jumystardy atqarýǵa úlken múmkindikter ashýda.
