Qazaqstandyq ǵalymdar qant dıabetiniń asqynýlaryn qashyqtan dıagnostıkalaý júıesin ázirledi

NUR-SULTAN. QazAqparat - Otandyq ǵalymdar dıabettik retınopatııany qashyqtan dıagnostıkalaýǵa arnalǵan biregeı baǵdarlamalyq joba ázirledi. Ol kóz túbiniń aýrýlaryn 90% dáldikpen anyqtaýǵa múmkindik beredi, dep habarlaıdy QazAqparat.

Jobany QR Bilim jáne ǵylym mınıstrligi qarjylandyrady. Ol qazirdiń ózinde Nur-Sultan men Almaty qalalaryndaǵy, sondaı-aq Soltústik Qazaqstan, Shyǵys Qazaqstan, Túrkistan, Aqmola oblystaryndaǵy 17 memlekettik jáne jekemenshik emhanada engizilgen.

Biregeı skrınıng júıesin ázirleýshi Erkebulan Jánibekulynyń aıtýynsha, kóz túbin sýretke túsirýdiń jańa tsıfrlyq ádisi oftalmoskoptyń kómegimen kóz túbin tekserýdiń qolmen jasalatyn ádisine qaraǵanda obektıvti bolyp esepteledi. Sondaı-aq ol dáriger men patsıenttiń ýaqytyn jáne qarajatyn únemdeıdi.

Ǵalym Erkebulan Jánibekulynyń aıtýynsha, júıe dıagnostıkada jańa tásildi kózdeıdi. Endi naýqastyń kóz túbin sýretke túsirýdi shalǵaı aýyldyq eldi mekendegi medıtsınalyq personal júrgize alady, al aýdan nemese oblys ortalyǵyndaǵy oftalmolog dáriger qashyqtan qorytyndy jasaı alady. Sonymen qatar jasandy ıntellekt algorıtmi dıabettik retınopatııanyń bolýyn, onyń satysyn joǵary dáldikpen anyqtaıdy jáne kóz túbiniń tolyq sıpattamasyn beredi.

Dıabettik retınopatııa – qant dıabetiniń asqynýy jáne ol tolyq soqyrlyqqa ákelýi múmkin. Sol sebepti aýrýdy erte kezeńde anyqtaý óte mańyzdy.

«Bizdiń júıedegi jasandy ıntellekt algorıtminiń dáldigi 91%-dy quraıdy»,-deıdi maman.

Baǵdarlamanyń taǵy bir ereksheligi – dárigerdiń qorytyndysy EyeLab platformasy men Damumed medıtsınalyq aqparattyq júıesin biriktirý arqyly patsıenttiń elektrondy densaýlyq pasportyna tirkeledi. Aldaǵy ýaqytta platformany engizilý arqyly dıabettik retınopatııanyń skrınıngtik protsedýrasyn tolyǵymen tsıfrlandyrý josparlanyp otyr.