Qazaqstandyq ǵalymdar «dońyz» jáne «qus» tumaýyna qarsy vaktsına jasap shyǵardy
ASTANA. Jeltoqsannyń 7-si. QazAqparat /Quralaı Orynbekqyzy/ - Qazaqstandyq ǵalymdar «dońyz» jáne «qus» tumaýyna qarsy vaktsına oılap tapty. Bul týraly búgin osy vaktsınanyń tanystyrylymy barysynda QR Bilim jáne ǵylym mınıstri Janseıit Túımebaev málim etti,
dep habarlaıdy QazAqparat tilshisi.
J.Túımebaevtyń aıtýynsha, vaktsınany professor Seıidǵappar Mamadalıev bastaǵan BǴM Bıologııalyq qaýipsizdik problemalarynyń ǵylymı-zertteý ınstıtýtynyń ǵalymdary jasap shyǵardy. «Bul eki jańa vaktsına - táýelsiz Qazaqstanda jasalǵan alǵashqy medıtsınalyq dári-dármekter. Bunyń aldynda qus tumaýyna qarsy veterınarlyq vaktsına oılap tabylǵan bolatyn», dep atap ótti mınıstr.
Vedomstvo basshysynyń sózine qaraǵanda, vaktsınany jasap shyǵarý jónindegi jumystar QR Densaýlyq saqtaý mınıstrligi, RF Ulttyq tumaý ortalyǵy ókilderiniń jáne Dúnıejúzilik densaýlyq saqtaý uıymy sarapshylarynyń baqylaýymen júzege asyryldy. «Vaktsına klınıkalyq zertteýlerden ótkizýge Sankt-Peterborda ornalasqan arnaıy mekemege jiberildi. Endi Qazaqstan «qus» tumaýyna qarsy óziniń vaktsınasy bar 13 memlekettiń, sondaı-aq «dońyz» tumaýyna qarsy vaktsınasy bar 5 eldiń qataryna kirdi», dedi mınıstr.
