Qazaqstandyq ǵalymdar bıdaıdyń ónimi mol jańa surpyn shyǵardy

KÓKShETAÝ. QazAqparat - Aqmola oblysynda gektarynan 50 tsentnerge deıin ónim beretin bıdaı sorty synaqtan sətti ótkizildi, dep habarlaıdy QazAqparat tilshisi.

Shortandy aýdanyndaǵy A.Baraev atyndaǵy Astyq sharýashylyǵy ǵylymı-óndiristik ortalyǵynyń málimeti boıynsha, atalmysh ortalyqtaǵy qatty bıdaı zerthanasynyń qyzmetkerleri ótken jyly «Damsa 2017» bıdaı sortyn synaqtan ótkizip, nátıjesinde ár gektardan 46,5 tsentnerden ónim aldy.

«Ǵalymdar bıdaıdyń jańa surpyn shyǵarýda zertteý jumystaryn 2015 jyly bastaǵan. Tabysty jumystyń nátıjesinde birneshe jyldan keıin bıdaıdyń tózimdiligi joǵary «Damsa 2017» jańa sorty dúnıege keldi. Elimizdiń soltústik óńirlerinde ósirýge arnalǵan bul sort aýa jáne topyraq qurǵaqshylyǵyna tózimdi. Ekologııalyq jazdyq dalalyq túrge jatady. «Damsa 2017» sorty shıki proteın men aqýyzdylyǵynyń turaqty quramymen erekshelenedi. Osy bıdaıdan alynǵan makaron túsi jáne jalpy baǵalaý boıynsha standartty kórsetkishten asyp túsedi», - deıdi A.Baraev atyndaǵy Astyq sharýashylyǵy ǵylymı-óndiristik ortalyǵynyń baspasóz hatshysy Aıan Qaıyrbaev.

Sonymen qatar, ekologııalyq sortty synaqtan ótkizý Soltústik Qazaqstan oblysynyń egistik alqaptarynda da júrgizildi. Odan ár gektardan 46,3 tsentnerden ónim alyndy. Aıtalyq, A.Baraev atyndaǵy astyq sharýashylyǵy ǵylymı-óndiristik ortalyǵynda byltyr jazdyq bıdaıdyń ónimdiligi 2,5 ese artyp 25,5 tsentnerge jetti.