Qazaqstandyq ǵalymdar bıdaıdan mol ónim alýdyń tetigin tapty
ASTANA. QazAqparat - A.Baraev atyndaǵy astyq sharýashylyǵy ǵylymı-óndiristik ortalyǵy Qatty bıdaı zerthanasynyń qyzmetkerleri 2018 jyly «Damsınskaıa 2017» sortynan bir gektardan 46,5 tsentner ónim aldy, dep habarlaıdy QazAqparat.
Atalǵan ortalyq málimetinshe, mundaı nátıjege jetý úshin zerthana qyzmetkerleri birneshe jyl jumys istegen.
Zertteý jumystary 2015 jyly bastalǵan bolatyn. Bir aıta keterligi, jańa sorttyń ereksheligi - tózimdiligi joǵary. Elimizdiń soltústik óńirlerinde ósirýge arnalǵan bul sort aýa jáne topyraq qurǵaqshylyǵyna tózimdi. Mıneraldy tyńaıtqyshtarmen ylǵaldandyrǵan jaǵdaıda mol ónim beredi. Ekologııalyq jazdyq dalalyq túrge jatady», - dep atap ótedi ortalyqtan.
«Damsınskaıa 2017» sorty shıki proteın men aqýyzdylyǵynyń turaqty quramymen erekshelenedi. Makaron túsi jáne jalpy baǵalaý boıynsha standartty kórsetkishten asyp túsedi.
Ekologııalyq sort synaq Soltústik Qazaqstan oblysynda da júrgizilip, atalǵan sort 46,3 tsentner ónim bergen.
Eske sala keteıik, Aqmola oblysynyń Shortandy aýdanynda ornalasqan A.Baraev atyndaǵy astyq sharýashylyǵy ǵylymı-óndiristik ortalyǵynda byltyr jazdyq bıdaıdyń ónimdiligi 2,5 ese artyp 25,5 tsentnerge jetti.
