Qazaqstandyq ǵalymdar Beıjińnen Qazaq handyǵyn zertteýge qatysty jańa qujattar tapty
ASTANA. QazAqparat - Halyqaralyq Túrki akademııasy ǵalymdarynan quralǵan delegatsııanyń Beıjińge sapary barysynda Qazaq handyǵy tarıhynyń jańa betterin ashatyn qundy qujattar tabyldy.
Halyqaralyq Túrki akademııasy (HTA) Beıjińde Qazaq handyǵynyń qurylýynyń 550 jyldyǵyna arnalǵan jıyn ótkizdi. Halyqaralyq Túrki akademııasynyń prezıdenti Darhan Qydyráli Elbasynyń Ulytaý tórinde bergen suhbatyndaǵy úzindini keltirdi. Onda: «Qazaq jurtynyń arǵy túbi ǵundardan bastalady. Ǵundardan keıin kók túrkilerge jalǵasady. Odan keıin Altyn Orda ornyǵady. Sóıtip, handyq dáýirge ulasyp, keıin birtindep Táýelsizdikke kelip tireledi», - delingen. Qytaılyq ǵalymdar Qazaq handyǵynyń materıaldaryna qyzyǵýshylyq tanytty. «Qazaq ǵalymdarynyń bizdiń ınstıtýtqa kelip, baıandama oqyp, pikir bólisýi qazaq tarıhynyń, jalpy qazaq halqy týraly bizdiń túsinigimizdi keńeıtti. Osy syndy sharalar bizdiń strategııalyq mańyzdy kórshimiz Qazaqstanmen gýmanıtarlyq-mádenı qatynastyń keńeıýine oń áserin tıgizedi», - dep atap ótti Qytaı qoǵamdyq ǵylymdar akademııasynyń etnologııa jáne antropologııa ınstıtýtynyń dırektory Van ıAnchjýn. Belgili ǵalym, professor Baı Tsýı Tsınniń sózine qaraǵanda, 1950 jyldan qytaı tilinde qazaq halqynyń tarıhy men mádenıeti týraly 2600-den astam ǵylymı maqala men 10-nan astam kitap jaryq kórdi. Sońǵy kezderi atalǵan baǵytty zertteý boıynsha doktorlyq jáne magıstrlyq jumystar sany kóbeıdi. Shara sońynda Qytaı qoǵamdyq ǵylymdar akademııasynyń birneshe ınstıtýty Halyqaralyq Túrki akademııasymen tyǵyz qarym-qatynasta jumys jasaýǵa daıyn ekendikterin bildirdi. Atap ótý kerek, sapar barysynda HTA ǵalymdary Qazaq handyǵy týraly buryn jarııalanbaǵan qundy qujattardy qolǵa túsirdi. Solardyń ishinde qazaq handary men sultandarynyń Tsın ımperatoryna shaǵataı jáne qalmaq tilderinde jazǵan hattary, Qazaq handyǵy men Tsın memleketi arasyndaǵy dıplomatııalyq baılanys týraly manchjýr tilindegi mańyzdy qoljazbalar bar. Qytaıǵa sapary aıasynda Halyqaralyq Túrki akademııasynyń prezıdenti myńdaǵan jyl buryn túrki álipbıin jazǵan jáne tilimizdiń ásemdigin álemge pash etken Mahmud Qashǵarıdiń molasynda boldy. Sondaı-aq bıyl myń jyldyq mereıtoıy toılanǵan ıÝsýf Balasaǵunıdiń rýhyna taǵzym etti. Delegatsııa Úrimshidegi qazaq zııalylarymen jáne ǵylym ókilderimen kezdesti.
