Qazaqstandyq ǵalymdar álemniń myqty zertteýshileriniń sanatynda bolsa eken dep armandaımyn - N.Nazarbaev

ASTANA. 29 qarasha. QazAqparat - Qazaqstandyq ǵalymdar álemniń myqty zertteýshileriniń sanatynda bolsa eken dep armandaımyn. Búgin «Bolashaq» halyqaralyq stıpendııasynyń 20 jyldyǵyna arnalǵan forýmda Elbasy Nursultan Nazarbaev osylaı dedi.

«Endi sóz sońynda aıtarym, jastar bilimge umytylýy kerek, ǵylymmen seriktes bolýy kerek. Sonda ǵana biz damyǵan 30 eldiń arasyna kiretin bolamyz. Men qazaqstandyq ǵalymdar álemniń myqty zertteýshileriniń sanatynda bolsa eken, qazaqstandyq óndirister eń sońǵy tehnologııamen jumys istese eken dep armandaımyn. Ýaqyt - júırik. Ol eshkimdi kútip turmaıdy. Toqtap qalsań, artta qalasyń», - dedi Elbasy. Sonymen qatar Memleket basshysy «Qazaqstan-2050» strategııasyn qaltqysyz oryndaı alsaq qana ulttyq uly maqsatymyz máńgilik eldiń myzǵymas negizin qalaıtyndyǵymyzdy basa aıtty. «Otanyn qaltqysyz súıgen urpaqqa daryǵan ǵylym men bilim eń qundy nárse bolyp tabylady. Senderge ár ýaqyttta qaryshty qadam, tabysty eńbek tileımin, jas dostar. Qazaq eliniń kelbeti kelisti, damýy jemisti bolsyn. Sol eldiń ishinde órkendep, ósip, senderde bala tárbıelep, nemere tárbıelep, elimizdiń bolashaǵyna, Qazaqstannyń bolmysyna dúnıejúziniń aldynda qýanatyn bolyńdar», - dep aıaqtady sózin N.Nazarbaev.