Qazaqstandyq ǵalymdar agrarshylar úshin 5 túrli jańa tehnıka jasap shyǵardy
ASTANA. QazAqparat - Qazaqstandyq ǵalymdar agrarshylar úshin jańa tehnıkanyń túrlerin jasap shyǵardy. Bul týraly QR AShM «Ulttyq agrarlyq ǵylymı bilim berý ortalyǵy» KEAQ Basqarma tóraǵasy Asqar Nametov OKQ-da ótken baspasóz máslıhatynda málim etti, dep habarlaıdy «QazAqparat» HAA tilshisi.
«Qazaq Ulttyq zertteý ınstıtýtynyń Qostanaı fılıaly ózderi oılastyrǵan tehnıkanyń bazasy negizinde egis qarsańyndaǵy tuqymdy óńdeý jáne egis kezindegi ónimdi jınaý boıynsha kóliktik-traktorlyq stantsııa jasap shyǵardy. Aýyl sharýashylyǵy ónimderin óndirýshiler tehnıkanyń táp-táýir ekenin, bizdiń aýa raıynyń jaǵdaıyna saı keletinin jáne onyń baǵasy básekege qabiletti bola alatynyn kórip otyr. Osylaısha, tehnıkany satyp ala bastady. 2016 jyly bizdiń UZI arqyly 120 mln teńgeniń, bıyl 200 mln teńgeniń tehnıkasy satyldy. Aldaǵy ýaqytta bul kórsetkishti 250-300 mıllıonǵa deıin jetkizý kózdelýde», - deıdi Asqar Nametov.
Onyń aıtýynsha, Qazaq UZI-nyń aýyl sharýashylyǵy mehanızatsııasy men Qazaqstan agrarly-ınnovatsııalyq korporatsııasy jańa tehnıkalardy shyǵarý baǵytynda kelisimge kelgen. Bıylǵy jyly tehnıkalardyń 5 túriniń alǵashqy nusqalary shyǵarylyp, olar synaqtan ótip, kelesi jyly serııalyq shyǵarylymdary iske asady. Sonymen birge qazaqstandyq taǵy eki zaýytpen birlesip, aýyl sharýashylyǵy tehnıkalaryn qurastyrý boıynsha jumystar júrgizilip jatyr.
Asqar Nametov sonymen qatar, óz sózinde qazaqstandyq ǵalym-agrarshylardyń oılap tapqan 600-ge jýyq jobalardyń 80-i qoldanysqa engizilip, olardyń ishindegi 16-y ınnovatsııalyq jobalar úshin granttyq baǵdarlama aıasynda qarjylandyrylǵanyn aıtady. Bul granttar Búkilálemdik bank pen Tehnologııalyq damý boıynsha Ulttyq agenttik pen Ǵylym Qoryna tıesili. Barlyq jobalardyń jeke sektor men qosymsha birlesip qarjylandyrý qarjylandyrý kózderinen bıznes-seriktesteri bar.
