Qazaqstandyq ǵalymdar 1 mıllıard 460 mıllıon teńgeniń granttaryn ıelendi
ASTANA. QazAqparat - Qazaqstandyq ǵalymdar 2014 jyly «Tehnologııalardy kommertsııalandyrý» jobasy sheńberinde 1 mıllıard 460 mıllıon teńge somasyna granttar ıelendi. Bul týraly Tehnologııalardy kommertsııalandyrý ortalyǵynyń baspasóz qyzmetinen habarlandy.
Eske sala keteıik, 2014 jyldyń 16 qyrkúıeginen bastap Dúnıejúzilik banktiń qoldaýymen «Tehnologııalardy kommertsııalandyrý» jobasy granttyq baǵdarlamasynyń ІІ-shi kezeńi aıasynda ǵylymı-tehnıkalyq qyzmettiń úzdik jobalaryna baıqaý ótkizgen bolatyn. Grant komıssııasy Qazaqstannnyń barlyq aımaqtarynan kelip túsken 200-den asa ótinimniń ishindegi eń qyzyqty degen 57 jobany kezekti irikteýge ótkizdi. Grant komıssııasynyń quramyna QR Bilim jáne ǵylym mınıstrliginiń, damý ınstıtýttarynyń, Tehnologııalardy kommertsııalandyrý ortalyǵynyń ókilderi jáne «CRDF Global» kompanııasynyń halyqaralyq sarapshylary kirdi.
«Usynylǵan tehnologııalardyń deńgeıi óte joǵary boldy. Árıne, olardy irikteý qıynǵa soqty, alaıda ınnovatsııalyǵyna jáne kommertsııalandyrý deńgeıine qoıylǵan talaptarǵa jaýap bergen tehnologııalar ǵana iriktep alyndy», - deıdi «CRDF Global» Azamattyq zertteýler jáne damytý amerıkandyq qorynyń basty sarapshysy Erık Azýleı. Sarapshylardyń sózine qaraǵanda, granttarǵa kóbinese Almaty jáne Astana qalalarynda, sondaı-aq, Qaraǵandy jáne Ońtústik Qazaqstan oblystarynan belsendilik baıqaldy. «Tehnologııalardy kommertsııalandyrýdyń tájirıbesi búgingi kúni qazaqstandyq zertteýshilerdiń naryqta suranysqa ıe tehnologııalardy jasap shyǵarýǵa qabiletti ekenin kórsetip otyr», - dedi «Tehnologııalardy kommertsııalandyrý ortalyǵy» JShS bas dırektory Damır Egizbaev. Baıqaýda bir orynǵa 22 ótinim talasty. Aqparattyq jáne telekommýnıkatsııalyq tehnologııalar, energetıka jáne mashına jasaý, sondaı-aq, tabıǵı qorlardy durys paıdalaný, shıkizat pen ónimdi qaıta óńdeý salasyndaǵy biregeı jobalar jeńdi. Eske sala keteıik, «Tehnologııalardy kommertsııalandyrý» jobasy granttyq baǵdarlamasynyń І-shi kezeńiniń nátıjesi boıynsha jalpy somasy 20 mlrd. teńgeden asatyn 526 ótinim kelip túsip, olardyń ishinde 710 mln. teńge somasyndaǵy 16 jobaǵa qoldaý jasalǵan. Al ekinshi kezeńde, jalpy somasy 750 mln. teńgeni quraıtyn granttardy alǵan ǵylymı jobalardyń 17 jeńimpazy anyqtaldy. Granttar kelesi eki baǵyt boıynsha bólindi: júzege asyrylýy 6 aıǵa deıingi merzimge 22 mln. teńgege deıingi qarjyny alǵan «Tujyrymdamanyń negizdemesi» baǵyty jáne júzege asyrylýy 2015 jylǵa deıingi merzimge 74 mln. teńgege deıingi somaǵa «Ónerkásiptik prototıpti qurý» baǵyty. Osylaısha, tutastaı alǵanda 2014 jyly eki kezeńde jalpy eseppen 1 mıllıard 460 mıllıon teńgege 33 jobaǵa qoldaý kórsetildi.
